වාද්දුවේ නිවසක් ගින්නෙන් විනාශයි

වාද්දුව, රතනසාර මාවතේ නිවසක අද (28දා) පස්වරුවේ හටගත් ගින්නකින් නිවස සහ එහි ගෘහ උපකරණ  සියල්ල මුළුමනින්ම විනාශ වී ඇතැයි වාද්දුව පොලිසිය පවසයි.

කළුතර නගර සභාවේ ප්‍රධාන ගිනි නිලධාරී පී.ඒ.යූ.එස්. කුරේ ඇතුළු ගිනි භඨයින් දස දෙනෙකු රැගත් ගිනි නිවන රථ දෙකක් ස්ථානයට ලඟාවී , වාද්දූව පොලීසිය සහ ප්‍රදේශවාසීන්ගේ සහාය ඇතිව ගින්න මුළුමනින්ම නිවාදැමීමට කටයුතු කරන ලද නමුත් , ඒ වන විට ගින්නෙන් මුළු නිවසම ගිනිබත් වී තිබූ අතර ,ගෘහ භාණ්ඩ සියල්ල ද මුළුමනින්ම පිලිස්සී තිබුණි.

වස්කඩුව විදුලි පෞද්ගලික සමාගමේ සේවකයින් පැමිණ ප්‍රදේශයේ ප්‍රධාන  විදුලි සැපයුම් පද්ධතිය විසන්ධි කොට ගින්න පාලනය කිරීමට සහාය විය .

විශාල පිපුරුම් හඬක් සමඟ  ගින්න හටගත් බව සිද්ධිය ඇසින් දුටුවන් පවසන අතර , නිවසේ ගෑස් සිලින්ඩරයටද හානි සිදුව තිබුණි.නිවස ඉදිරිපිට තිබූ අඩි විස්සකට අධික උස පොල් ගසක්  මුළුමනින්ම විනාශවී තිබු අතර , අවට නිවාස වලට ගින්න පැතිරීම වැළැක්වීමට  ප්‍රදේශවාසීන් ක්‍රියාකර තිබුණි .

ගින්නෙන් ජීවිත හානි සිදුව නොමැති අතර , ගින්නට හේතුව විදුලි කාන්දුවක්ද ගෑස් පිපිරීමක් ද  යන්න නිල වශයෙන් මෙතෙක් අනාවරණය වී නොමැත.

පානදුර සුමිත් පොතුපිටිය /වාද්දුව දයා හේමන්ත සිල්වා