රිජ්වේ ආර්යා ළමා රෝහලට අති නවීන න්‍යෂ්ටික ප්‍රතිබිම්භ ඒකකයක්

කොළඹ රිජ්වේ ආර්යා ළමා රෝහලේ ස්ථාපිත කරන ලද නව න්‍යෂ්ටික ප්‍රතිබිම්භ ඒකකය (Gamma Camera) ඊයේ දින ප්‍රතිකාර සේවාවන් සදහා එක් කිරීම සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ මහතාගේ ප්‍රධානත්වයෙන් සිදුවිය.

රුපියල් මිලියන 154 ක් වටිනා මෙම අති  නවීන තාක්ෂණයෙන් යුත්  න්‍යෂ්ටික ප්‍රතිබිම්භ ඒකකය (Gamma Camera)  සදහා මුදල් ප්‍රතිපාදන  සෞඛ්‍ය අමාත්‍යාංශයෙන් ලබා දී ඇත. වකුගඩු රෝග ප්‍රධාන කොට රෝග විනිශ්චය කටයුතු සදහා මෙම උපකණය භාවිතා කරනු ලබයි.

මෙතෙක් මෙම පරීක්ෂණ කටයුතු සදහා රිජ්වේ ආර්යා ළමා රෝහලේ ස්ථාපිත කර ඇති යන්ත්‍රය වසර 20 වඩා පැරණි යන්ත්‍රයක් වන අතර එය වරින්වර අක්‍රිය තත්ත්වයට පත්වෙමින් තිබිණි. එම අවස්ථාවන් වල දී පරීක්ෂණ කටයුතු කොළඹ ජාතික රෝහලෙන් සිදුකර ගන්නා ලදී.

මේ පිළිබඳව වත්මන් සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා කොළඹ රිජ්වේ ආර්යා ළමා රෝහලේ මීට මාස කිහිපයකට පෙර සිදු කරන ලද නිරීක්ෂණ චාරිකාවේ දී රෝහල් පරිපාලනය සහ රෝහල් කාර්ය මණ්ඩලය මෙම අවශ්‍යතාවය පිළිබඳව දැනුවත් කිරීමට පියවර ගත් අතර එහි දී නව (Gamma Camera) න්‍යෂ්ටික ප්‍රතිබිම්භ ඒකකයක් කඩිනමින් රෝහල තුළ ස්ථාපිත කිරීමට පියවර ගන්නා මෙන් අමාත්‍යවරයා සෞඛ්‍ය අමාත්‍යාංශයේ  නිලධාරීන් ට උපදෙස් දෙන ලදී. ඒ අනූව මෙම  යන්ත්‍රය රෝහල තුළ ස්ථාපිත කිරීමට කටයුතු කරන ලදී.

කොළඹ ජාතික රෝහල, කරාපිටිය ජාතික රෝහල, පේරාදෙණිය ශික්ෂණ රෝහල යන රජයේ රෝහල්වල මෙම යන්ත්‍රය  ස්ථාපිත කර ඇති අතර එමගින්  රෝගී සත්කාර සේවාවන් කාර්යක්ෂමව සිදුකරනු ලබයි.

මෙම අති නවීන යන්ත්‍රය මගින් කාර්යක්ෂම හා ගුණාත්මක සේවාවක් මෙරට ජනතාවට ලබා දීමට හැකියාව ලැබෙන බවත්, සියලු සෞඛ්‍ය කාර්ය මණ්ඩලයේ දායකත්වයෙන් එම සේවාවන්  ඉටු කිරීමට කටයුතු කරන බව විකිරණ විශේෂඥ වෛද්‍ය නයනා සමරසිංහ මහත්මිය මෙහි දී පැහැදිලි කළා ය.

මෙම අති නවීන උපකරණය රෝහලට ලබා දීම පිළිබඳව නව රජයටත්, වත්මන්  සෞඛ්‍ය අමාත්‍යවරයාටත් ළමා රෝහල වෙනුවෙන් විශේෂ ස්තූතියක් පුදකරන බව කොළඹ රිජ්වේ ආර්යා ළමා රෝහලේ අධ්‍යක්ෂ විශේෂඥ වෛද්‍ය ප්‍රදීප් විජේසිංහ මහතා මෙහි දී පැවසී ය. එමෙන් ම දිවයින පුරා වෙසෙන දරුවන්ගේ වකුගඩු රෝග පිළිබඳව නිවැරදි රෝග විනිශ්චය ලබා දීමට ද රෝහල කටයුතු කරන බවද ඒ මහතා වැඩිදුරටත් පැවසී ය.