මාරක රිය අනතුරු 06 ක් පිළිබඳ වාර්තා පාර්ලිමේන්තුවට

පාර්ලිමේන්තු පුස්තකාලයේ පරිශීලනය සඳහා  ප්‍රවාහන, මහාමාර්ග, වරාය හා සිවිල් ගුවන් සේවා අමාත්‍යාංශය විසින් සම්පාදිත ග්‍රන්ථ කිහිපයක් පාර්ලිමේන්තු පුස්තකාලය වෙත භාරදීම පසුගියදා සිදුවිය. ඒ අනුව ‘මාර්ග ආරක්‍ෂණ ක්‍රියාකාරී සැලැස්ම 2025-2026’ ග්‍රන්ථය මෝටර් රථ ප්‍රවාහන කොමසාරිස් ජනරාල් කමල් අමරසිංහ මහතා විසින් පාර්ලිමේන්තු නියෝජ්‍ය කාරක සභාපති හේමාලි වීරසේකර මහත්මිය වෙත එතුමියගේ කාර්යාලයේ දී නිල වශයෙන් පිරිනැමීම සිදු කෙරිණ.

එයට අමතරව ප්‍රවාහන, මහාමාර්ග, වරාය හා සිවිල් ගුවන් සේවා අමාත්‍ය සහ ශ්‍රී ලංකා පාර්ලිමේන්තුවේ සභානායක බිමල් රත්නායක මහතාගේ උපදෙස් මත, පසුගිය කාලයේ සිදුවූ මාරක රිය අනතුරු 06 පිළිබඳ මෝටර් රථ ප්‍රවාහන දෙපාර්තමේන්තුව මගින් සකස් කරන ලද පරීක්‍ෂණ වාර්තාද භාරදීම මෙහිදී සිදුවිය. 

2025.09.04 වන දින ඇල්ල - වැල්ලවාය මාර්ගයේ කි. මී. 23 සහ කි. මී. 24 කණුව අතර 24/6 බෝක්කුව ආසන්නයේ දී සිදුවූ මාරක රිය අනතුර, 2025.06.21 වන දින බදුල්ල - මහියංගණ මාර්ගයේ තිඹිරිගස්පිටිය ප්‍රදේශයේ දී සිදුවූ මාරක රිය අනතුර, 2025.05.11 වන දින නුවරඑළිය - මහනුවර මාර්ගයේ ගැරඬිඇල්ල ප්‍රදේශයේ දී සිදුවූ මාරක රිය අනතුර, 2024.11.01 වන දින බදුල්ල - මහියංගණ මාර්ගයේ අඹගහඔය දී සිදුවූ මාරක රිය අනතුර, 2023.01.20 වන දින නුවරඑළිය - හැටන් මාර්ගයේ රදැල්ල - සමර්සෙට් විකල්ප මාර්ගයේ සිදුවූ මාරක රිය අනතුර, 2020.01.06 වන දින පස්සර - මඩොල්සිම මාර්ගයේ 06 කණුව දළුමඩුව හන්දිය පසුකර මීටර් 200 ක් පමණ මඩොල්සිම දෙසට ගමන් කිරීමේදී හමුවන ප්‍රදේශයේ සිදුවූ මාරක රිය අනතුර යන රිය අනතුරුවලට අදාල වාර්තා මෙසේ පාර්ලිමේන්තු පුස්තකාලය වෙත භාරදී තිබේ.