පාර්ලිමේන්තුව වහා කැඳවන්නැයි ඩලස්ලා කියති

මැතිවරණය කල් දැමීම සමඟ රටේ උද්ගතවී ඇති තත්වය සම්බන්ධයෙන් සාකච්ඡා කිරීම සඳහා පාර්ලිමේන්තුව වහාම කැඳවන්නැයි ව්පක්ෂයේ මන්ත්‍රීවරු 14 දෙනෙක් සිය අත්සන් සහිත ලිපියක් යොමු කරමින් අගමැතිවරයාගෙන් සහ කතානායකවරයාගෙන් ඊයේ (15) ඉල්ලීමක් කර තිබේ.

පාර්ලිමේන්තුව රැස්වීමට නියමිතව ඇත්තේ පළාත් පාලන මැතිවරණයට  අදාල තැපැල් ඡන්දය ක්‍රියාත්මක වීමට නියමිත දිනයේ බවත් තැපැල් ඡන්දය පැවැත්වීම අවිනිශ්චිතව ඇති පරිසරයක මහජන නියෝජිතයන් ලෙස සිය වගකීම ඉටු කළ යුතු හෙයින් පාර්ලිමේන්තුව වහාම කැඳවන්නැයි මෙසේ ඉල්ලා සිටින බවත් එම ලිපියේ සඳහන් වෙයි.

මෙම අත්සන් සහිත ලිපිය අගමැතිවරයාට සහ කතානායකවරයාට යොමු කරනු ලැබ ඇත්තේ නිදහස් ජනතා සන්ධානය ප්‍රධාන ලේකම් තිලංග සුමතිපාල මහතා විසිනි.