නීති විරෝධී මත්පැන් සමග අයෙක් දැලේ

තලවතුගොඩ වික්‍රමසිංහපුර නිවාස සංකීර්ණයේ  දෙමහල් නිවසක් තුළ  නීති විරෝධී මත්පැන් පෙරමින් සිටි පුද්ගලයෙක් අත්අඩංගුට ගත් බව ශ්‍රී ජයවර්ධනපුර සුරාබදු  ඒකකය පවසයි.

එම සැකකරු සමඟ නීති විරෝධී මත්පැන් මිලිලීටර් 23350 ක් , කිරීමට සූදානම් කර තිබූ ගෝඩා  ලිටර්  ලක්ෂ දෙකක් ,ගෑස් ලිපක් තඹ දඟරයක් සිලින්ඩරයක් සුරාබදු නිලධාරීන් භාරයට ගෙන ඇත.

තලංගම  අකුරේගොඩ ප්‍රදේශයේ දී නීති විරෝධී මත්පැන් ස්ප්‍රීතු මිලිලීටර් 4500 ක් සමග අත්අඩංගුවට ගත් පුද්ගලයකුගෙන්  සිදු කළ ප්‍රශ්න කිරීමේදී අනාවරණය වූ තොරතුරු අනුව  වැටලීම සිදු කළ බව පොලිසිය කියයි

වික්‍රමසිංහපුර දෙමහල් නිවසේ මත්පැන් පෙරණ  පුද්ගලයා ත්‍රීරෝද රථ රියදුරෙකු වන අතර  පෙරන ලද මත්පැන්  කුලී ගමන් යන මුවාවෙන්  තලංගම ඇතුළු අවට  ප්‍රදේශ වලට බෙදා හැර ඇතැයි  සැකකරුගෙන් සිදුකරන ලද ප්‍රශ්න කිරීමේදී අනාවරණ වූ බව සුරාබදු නිලධාරී පැවසීය

දෙමහල් නිවසක උඩුමහලේ නාන කාමරේට යාබද පිහිටා තිබෙන කාමරය  මෙම  නීති විරෝධී මත්පැන් පෙරීම සඳහා ම  සකස් කර තිබූ බවත් සුරාබදු කාර්යාලය කියයි.

වයස අවුරුදු හතළිස් නවයක් වන සැකකරුවන් අධිකරණය වෙත ඉදිරිපත් කිරීමට නියමිතය.