තරුණයෙක් පැහැරගෙන ගිය පෞද්ගලික සරසවියක සිසුන් 4ක් අත්අඩංගුවට

කුරුඳුවත්ත තුරග තරග පිටිය අසල දී තරුණයකු පැහැරගෙන මෝටර් රථයකින් රැගෙන ගොස් පහර දී රන් මාලයක් ද කොල්ල කා කොල්ලුපිටිය ලිබර්ටි වටරවුම අසල දමා ගිය රාජගිරිය පෞද්ගලික විශ්ව විද්‍යාලයක සිසුන් සිව් දෙනෙක් අත්අඩංගුවට ගත් බව කුරුඳුවත්ත පොලිසිය කියයි.

පැහැර ගැනීමට යොදාගත් මෝටර් රථය ද පොලිස් බාරයට ගෙන ඇත.පහර කෑ තරුණයා රෝහල් ගතව ඇත.

පහර කෑ තරුණයා නුගේගොඩ ප්‍රදේශයේ උත්සව ශාලාවක පැවති උපන්දින සාදයකට සහභාගි වී මිතුරන් පිරිසක් සමඟ කුරුඳුවත්ත තුරඟ තරඟ පිටිය අසලට පැමිණ සිටියදී මෝටර් රථයකින් පැමිණි තිබු සැකකරුවන් තරුණයා පැහැරගෙන ගොස් තිබූ බවයි පොලිස් විමර්ශනවලදී අනාවරණය වී තිබිණි.

පහර දුන් පිරිස අතර සිටින තරුණයෙකුගේ පෙම්වතියගේ ඡායාරූප අන්තර්ජාලය ඔස්සේ ප්‍රසිද්ධ කිරීම සම්බන්ධයෙන් උරණ වී පහර කෑ තරුණයා ට දුරකථන ඇමතුමක් දී හමුවීමට අවශ්‍ය බව දන්වා පැමිණ මෙම පැහැර ගැනීම සිදුකර තිබූ බව පොලීසිය සඳහන් කරයි.

සැකකරුවන් අධිකරණය වෙත ඉදිරිපත් කිරීමට නියමිතය.

කුරුඳුවත්ත පොලීසියේ ස්ථානාධිපති ප්‍රධාන පොලිස් පරීක්ෂක ආලෝක බණ්ඩාර සේනානායක මහතාගේ උපදෙස් මත පරීක්ෂණ පවත්වයි.