කුරුණෑගල නියෝජ්‍ය නගරාධිපතිගේ පක්ෂ සාමාජිකත්වය අත්හිටුවයි

නාගරික ටෙන්ඩර් ක්‍රියාවලියකට අදාළව අල්ලස් ලබා ගැනීම සම්බන්ධ චෝදනා මත, අල්ලස් හෝ දූෂණ චෝදනා විමර්ශන කොමිෂන් සභාව විසින් අත්අඩංගුවට ගනු ලැබූ කුරුණෑගල මහ නගර සභාවේ නියොජ්‍ය නගරාධිපති එම්. අෂාඩීන් මොයිනුදීන්මහතාගේ පක්ෂ සාමාජිකත්වය  වහාම අත්හිටුවීමට සමස්ත ලංකා මහජන කොංග්‍රසය (ACMC) තීරණය කර ඇති බව එම පක්ෂය නිවේදන කරයි.

දූෂණයට එරෙහිව සහ මහජන විශ්වාසය මෙන්ම නීතියේ ආධිපත්‍යය පළුදු කරන ඕනෑම හැසිරීමකට එරෙහිව සමස්ත ලංකා මහජන කොංග්‍රසය දැඩි සහ සම්මුති විරහිත ප්‍රතිපත්තියක් අනුගමනය කරන බවත් මහජන පදවි නාමයන්ට හෝ  පක්ෂය අගය කරන අඛණ්ඩතාව සහ වගවීම පිළිබඳ මූලධර්මවලට කැළලක් ඇති කරන කිසිදු ක්‍රියාවක් පක්ෂය අනුමත නොකරන බවත් එම පක්ෂය නිවේදනය කරයි. සමස්ත ලංකා මහජන කොංග්‍රසයේ නායකත්වය දරන්නේ හිටපු අමාත්‍යවරයෙක් වන රිෂාඩ් බද්යුදින් මහතායි.

පක්ෂය නිකුත් කළ නිවේදනයේ වඩිදුරටත් පහත පරිදි දැක්වෙයි...

දැනට පවතින විමර්ශනවල සහ ඉන් අනතුරුව සිදු කෙරෙන ඕනෑම නීතිමය කටයුත්තක ප්‍රතිඵලය ලැබෙන තෙක් මෙම අත්හිටුවීම බලාත්මක වේ. කිසිදු බාධාවකින් තොරව නීතිය ක්‍රියාත්මක වීමට ඉඩ දිය යුතු බව පක්ෂය විශ්වාස කරන අතර අදාළ බලධාරීන් සමඟ පූර්ණ සහයෝගයෙන් කටයුතු කිරීමට අපේක්ෂා කරයි.

අදාළ පුද්ගලයාගේ මෙම ක්‍රියාවන් සම්පූර්ණයෙන්ම ඔහුගේ පෞද්ගලික මට්ටමින් සිදු වූ ඒවා වන අතර, ඒවා පක්ෂයේ වටිනාකම්, මූලධර්ම හෝ නිල ස්ථාවරය පිළිබිඹු නොකරන බව සමස්ත ලංකා මහජන කොංග්‍රසය අවධාරණය කිරීමට කැමතිය.

පක්ෂය මෙම කරුණ සම්බන්ධයෙන් සිදුවන වර්ධනයන් සමීපව නිරීක්ෂණය කරන අතර, පක්ෂ ව්‍යවස්ථාවට සහ විනය ක්‍රියා පටිපාටිවලට අනුකූලව අවශ්‍ය ඕනෑම ඉදිරි පියවරක් ගනු ඇත.