කටුනායක ගුවන් තොටුපොළේ සංචාර සේවා කවුන්ටර් 6ට කැබිනට් අනුමැතිය

කටුනායක ජාත්‍යන්තර ගුවන්තොටුපොළේ පැමිණීමේ ලොබියේ සංචාර සේවා කවුන්ටර 06ක් ක්‍රියාත්මක කිරීම සඳහා සුදුසු ආයතන තෝරා ගැනීමට අදාළ ප්‍රසම්පාදන පිරිනැමීම සඳහා අමාත්‍ය මණ්ඩල අනුමැතිය හිමිව තිබේ.

ඒ සඳහා ජාතික තරගකාරී ලංසු කැඳවීමේ ක්‍රමවේදය යටතේ ලංසු කැඳවා ඇති අතර, ලංසු 10ක් ඉදිරිපත් වී තිබේ.

ලංසු ඇගයීමෙන් අනතුරුව ඉහළ මට්ටමේ ස්ථාවර ප්‍රසම්පාදන කමිටුව ලබාදුන් නිර්දේශ මත පදනම්ව, වසර 03ක කාලයක් සඳහා අදාළ සංචාර සේවා කවුන්ටර ක්‍රියාත්මක කිරීමේ ප්‍රසම්පාදන පිරිනැමීමට අමාත්‍ය මණ්ඩලය අනුමැතිය ලබාදී ඇත.

ඒ අනුව, කවුන්ටර අංක 10 සඳහා M/s Casons Travel (Private) Ltd වෙත රුපියල් මිලියන 251.03ක මුදලකටද, කවුන්ටර අංක 11 සඳහා M/s JN W Lanka Tours වෙත රුපියල් මිලියන 209.67ක මුදලකටද ප්‍රසම්පාදනය පිරිනැමීමට නියමිතය.

කවුන්ටර අංක 12 සඳහා M/s Awavia Tours (Private) Ltd වෙත රුපියල් මිලියන 189.66ක මුදලකටද, කවුන්ටර අංක 13 සඳහා M/s Ceylon Arrivals (Private) Ltd වෙත රුපියල් මිලියන 183.60ක මුදලකටද ප්‍රසම්පාදන පිරිනැමීමට නියමිතය.

එමෙන්ම, කවුන්ටර අංක 14 සඳහා M/s Ayubowan Tours & Travels (Private) Ltd වෙත රුපියල් මිලියන 171.53ක මුදලකටද, කවුන්ටර අංක 15 සඳහා M/s Explore Vacations and Travels (Private) Ltd වෙත රුපියල් මිලියන 234.73ක මුදලකටද ප්‍රසම්පාදන පිරිනැමීමට අනුමැතිය ලබාදී තිබේ.

අදාළ සියලුම මුදල් බදු රහිත වටිනාකම් වන අතර, මෙම කවුන්ටර මගින් විදේශීය සංචාරකයන්ට සහ අනෙකුත් ගුවන් මගීන්ට ගුවන්තොටුපොළට පැමිණීමෙන් අනතුරුව අවශ්‍ය සංචාරක සේවා සහ තොරතුරු පහසුකම් ලබාගැනීමට අවස්ථාව සැලසෙනු ඇත.

ආයෝජකයින්ට පහසුකම් සැලසීමට ජාතික ව්‍යාපාර පහසුකම් මධ්‍යස්ථානයක්

දේශීය ආයෝජන ආරම්භ කිරීමේදී පවතින පරිපාලනමය බාධා සහ අනුමැති ලබාගැනීමේ ප්‍රමාදයන් අවම කරමින් ආයෝජන හිතකාමී පරිසරයක් නිර්මාණය කිරීම සඳහා ජාතික ව්‍යාපාර පහසුකම් මධ්‍යස්ථානයක් ස්ථාපිත කිරීමට අමාත්‍ය මණ්ඩල අනුමැතිය හිමිව තිබේ.

විවිධ රාජ්‍ය ආයතන අතර බෙදී පවතින අනුමැති ක්‍රියාවලීන්, ආයතන අතර ප්‍රමාණවත් සම්බන්ධීකරණයක් නොමැතිවීම සහ ආයතනික බලතලවල පවතින අතිපිහිත තත්ත්වයන් හේතුවෙන් මෙරට දේශීය ආයෝජන ක්ෂේත්‍රය අභියෝග රැසකට මුහුණ දී ඇති බව හඳුනාගෙන තිබේ.

විශේෂයෙන් ව්‍යාපෘති සඳහා ඉඩම් වෙන්කරවා ගැනීම, පාරිසරික අනුමැති සහ නියාමන බලපත්‍ර ලබාගැනීම, විදුලි හා ජල සම්බන්ධතා ලබාගැනීම මෙන්ම බැංකු හා මූල්‍ය පහසුකම් සලසා ගැනීමේදී සිදුවන ප්‍රමාදයන් හේතුවෙන් ආයෝජකයින් අපහසුතාවට පත්වන අතර, ඇතැම් අවස්ථාවලදී ආයෝජන සඳහා ඔවුන් අධෛර්යයට පත්වන බවද හඳුනාගෙන ඇත.

ඒ අනුව, ව්‍යාපාර ආරම්භ කිරීමට අපේක්ෂා කරන දේශීය ව්‍යවසායකයින්ට අවශ්‍ය මගපෙන්වීම සහ පහසුකම් සැලසීම සඳහා ජනාධිපති ලේකම් කාර්යාලය යටතේ මෙම ජාතික ව්‍යාපාර පහසුකම් මධ්‍යස්ථානය ස්ථාපිත කිරීමට නියමිතය.

ආයෝජන සඳහා පවතින පරිපාලනමය බාධා ඉවත් කරමින් කර්මාන්ත ක්ෂේත්‍රයේ ප්‍රතිපත්ති ප්‍රශස්තකරණය සඳහා ඉහළ අධිකාරිත්වයක් සහිතව මෙම මධ්‍යස්ථානය ක්‍රියාත්මක කිරීමට ජනාධිපතිවරයා ඉදිරිපත් කළ යෝජනාවට අමාත්‍ය මණ්ඩල අනුමැතිය ලබාදී තිබේ.