උඩරට දුම්රිය ධාවනයට බාධා

උඩරට දුම්රිය මාර්ගයේ හපුතලේ  දියතලාව  දුම්රිය ස්ථාන අතර දුම්රිය මාර්ගයට අද (19) අලුයම විශාල ගල්පර්වත පස්කදු කඩා වැටීමෙන් බදුල්ල කොළඹ දුම්රිය ධාවනයට බාධා සිදුව ඇතැයි දුම්රිය දෙපාර්තමේන්තුව පවසයි .

දුම්රිය දෙපාර්තමේන්තුවේ රාත්‍රි මාර්ග සංචාර රාජකාරියේ නිරතව සිටි දුම්රිය සේවකයකු අද (19) අලුයම මෙසේ හපුතලේ දියතලාව දුම්රිය ස්ථාන අතර 155/25 සැතපුම් කණුව අසලදී දුම්රිය මාර්ගය ට විශාල ගල්පර්වත පස්කදු කඩා වැටී ඇති අයුරු දැක  දැනුම් දීම නිසාවෙන් අද (19) අලුයම කොළඹ බදුල්ල රාත්‍රි තැපැල් දුම්රිය එම ස්ථානය ට ලගා වීමට ඉඩ නොදී අතරමගදී නවතා ගෙන සිදු වීමට ගිය විශාල අනතුරක් වලකා ගත් බවද  දුම්රිය බළධාරීන් පැවසූහ .

මේ නිසාවෙන් කොළඹ කොටුව සිට බදුල්ල බලා ධාවනය වූ රාත්‍රි තැපැල් දුම්රිය දැනට හපුතලේ දුම්රිය ස්ථානයේ නවතා තබා ඇති බවත් , බදුල්ල සිට කොළඹ කොටුව බලා අද (19) අලුයම 5.45ට ධාවනය වීමට නියමිතව තිබූ උඩරට මැණිකේ දුම්රිය මෙතෙක් ගමන් ආරම්භ නොකල බවද  දුම්රිය දෙපාර්තමේන්තුවේ ප්‍රකාශයකු කීය .

දුම්රිය  දෙපාර්තමේන්තුවේ ඔහිය දුම්රිය මාර්ග අංශයේ දුම්රිය මාර්ග අධීක්ෂණ කළමනාකරු මනිමේන්ද්‍ර්න් මහතාගේ මෙහෙයවීම මත ඔහිය දුම්රිය මාර්ග අංශයේ තාක්ෂණ ශිල්පීන්  දුම්රිය මාර්ගය ට කඩා වැටී ඇති ගල්පර්වත පස්කදු ඉවත් කිරිමේ කටයුතු ආරම්භ කර ඇතැයි දුම්රිය බළධාරීන් පැවසූහ .

ඇල්ල ප්‍රසාද් රුක්මල්