උඩරටට කෝච්චිය යන දවසක් හිතා ගන්නවත් බෑ

රටට බලපෑ අයහපත් කාලගුණික තත්ත්වය මත රාජ්‍ය ආයතන අතුරින් වැඩිම හානිය සිදුව ඇත්තේ  දුම්රිය දෙපාර්තමේන්තුවට බව දුම්රිය ස්ථානාධිපතිවරුන්ගේ සංගමය නිවේදනය කරයි.

උඩරට දුම්රිය මාර්ගය මුළුමනින්ම පාහේ විනාශ වී ඇති අතර දුම්රිය සේවා සැපයීම ආදී විශාල රාජකාරි හා ගැටළු රාශියකට  දෙපාර්තමේන්තුව මේ වන විටත්  මුහුණ දෙමින් ඇතැයි එම සංගමය පවසයි.

පවතින තත්ත්වය නිරීක්ෂණය කිරීමේ දී උඩරට දුම්රිය මාර්ගය යලි යථාවත් කිරීමට බොහෝ කාලයක් ගතවනු ඇති බව පෙන්වා දෙන එම දෙපාර්තමේන්තුව මේ සම්බන්ධයෙන් ජනාධිපතිවරයා වෙත එම සංගමය කරුණු දැක්වීමක්ද කර තිබේ.

එම ලිපිය පහත පරිදි වෙයි

අතිගරු ජනාධිපතිතුමා,

ජනාධිපති ලේකම් කාර්යාලය,
කොළඹ 01.

උද්ගතව ඇති ආපදා තත්ත්වය හමුවේ දුම්රිය සේවය යථාවත් කිරීම සම්බන්ධවයි. 

රට තුළ  උද්ගත වූ දරුණු අයහපත් කාලගුණික තත්ත්වය හේතුවෙන් ජීවිත අහිමි වූ අපගේ සියලුම සහෝදර සහෝදරියන්ට ශ්‍රී ලංකා දුම්රිය ස්ථානාධිපතිවරුන්ගේ සංගමයේ බලවත් ශෝකය ප්‍රකාශ කරමු. ජල ගැලීම් හා නාය යාම් හේතුවෙන් තුවාල ලබා දැනට ප්‍රතිකාර ලබන සියල්ලන්ට ම ඉක්මන් සහ සම්පූර්ණ සුවය ප්‍රාර්ථනා කරන අතර, මෙම ඛේදජනක කාල පරිච්ඡේදයේ දී විපතට පත් සියල්ලන්ගේ ම පවුල්වලට අපගේ කණගාටුව ප්‍රකාශ කරමු.

ජාතික ප්‍රවාහන ක්ෂේත්‍රයේ දැවැන්ත කාර්ය භාරයක් ඉටු කරන ශ්‍රී ලංකා දුම්රිය සේවය  පෙර නොවූ විරූ මෙම ස්වාභාවික ව්‍යසනයෙන් දැඩි ලෙස බලපෑමට ලක් ව ඇත. දුම්රිය මාර්ග, පාලම්, දුම්රිය ස්ථාන, සංඥා පද්ධති සහ ප්‍රධාන ගොඩනැගිලිවලට විශාල හානියක් සිදුවී ඇත. විනාශය කෙතරම් දරුණු හා පුළුල් ද යත්, සම්පූර්ණ ප්‍රතිසංස්කරණය සඳහා අවශ්‍ය සැබෑ පිරිවැය සහ කාලය තවමත් තක්සේරු කළ නොහැක.

ශ්‍රී ලංකාවේ දුම්රිය යනු ප්‍රවාහන මාධ්‍යයක් පමණක් නොවන අතර, අප රටේ ආර්ථිකයේ තීරණාත්මක අංගයක් වන අතර ජාත්‍යන්තර සහ දේශීය සංචාරකයින්ගේ ආකර්ෂණය දිනාගත් අංගයකි. උඩරට මාර්ගයේ විශේෂයෙන් බදුල්ල දෙසට ඇති දර්ශනීය කොටස වැනි සංකේතාත්මක මාර්ග, ලෝකයේ සුන්දරම දුම්රිය ගමන් අතර ශ්‍රේණිගත වේ. එබැවින් මෙම මාර්ග යථා තත්ත්වයට පත් කිරීම මගී ගමනාගමනය සඳහා පමණක් නොව සංචාරක කර්මාන්තය නැවත පණ ගැන්වීමට සහ ඒ මත යැපෙන පවුල් දහස් ගණනකට සහාය වීමට ද අත්‍යවශ්‍ය වේ.

වර්තමානයේ, සීමිත දුම්රිය වාර ගණනක් පමණක් ක්‍රියාත්මක වන අතර, ඉන් මුහුදුබඩ මාර්ගය ප්‍රධාන ක්‍රියාකාරී මාර්ගය වේ. සිදුව ඇති හානියේ බරපතලකම සැලකිල්ලට ගනිමින්, විදේශීය දුම්රිය ඉංජිනේරු සමාගම් සහ ජාත්‍යන්තර ආපදා ප්‍රතිචාර ආයතනවලින් වහාම සහාය ලබා ගන්නා ලෙස සංගමයක් වශයෙන් අපි රජයෙන් ඉල්ලා සිටින්නෙමු. ඔවුන්ගේ තාක්ෂණික විශේෂඥතාව, දියුණු යන්ත්‍රෝපකරණ සහ වේගවත් යෙදවීමේ හැකියාවන්, මාර්ග ප්‍රතිසංස්කරණය කිරීම, බැමි ස්ථාවර කිරීම, පාලම් ප්‍රතිසංස්කරණය කිරීම සහ සංඥා සහ සන්නිවේදන පද්ධති නැවත සක්‍රිය කිරීම සඳහා අත්‍යවශ්‍ය වේ.

එසේ ම, හැකි සියලුම දුම්රිය මාර්ග අදියර වශයෙන් සහ ආරක්ෂිතව නැවත විවෘත කිරීමේ වැදගත්කම ද අපි අවධාරණය කරන්නෙමු. විශේෂයෙන්, වහා ම ප්‍රතිසංස්කරණය කළ හැකි කොටස්වල මෙහෙයුම් නැවත ආරම්භ කිරීම සඳහා ප්‍රමුඛතාවය දිය යුතු ය. උදාහරණයක් ලෙස, කළ යුත්තේ සම්පූර්ණ අළුත්වැඩියාවන් සිදු කරන තෙක් උඩරට මාර්ගයේ දුම්රිය ධාවනය අත්හැර දැමීම නොව, බදුල්ල නානුඔය දුම්රිය ස්ථාන අතර නවතා ඇති දුම්රියයන් උපයෝගී කර අවම වශයෙන් විදේශීය සංචාරකයින් ඉලක්ක කරගනිමින් දුම්රිය ධාවනය කරවීමයි. සංචාරක කර්මාන්තය නැවත පණ ගැන්වීමට එය මහත් රුකුලක් වනු ඇත.  

එබැවින්, ආරක්ෂාව සහ විශ්වසනීයත්වය සමඟින් අපගේ දුම්රිය ජාලය නැවත ගොඩනැගීම සඳහා රාජ්‍ය, පෞද්ගලික අංශයේ සහ ජාත්‍යන්තර සහයෝගය ලබා ගැනීම අත්‍යවශ්‍ය බව පෙන්වා දීමට කැමැත්තෙමු. ආරක්ෂිත සහ විශ්වාසදායක දුම්රිය සේවා කඩිනමින් යථා තත්ත්වයට පත් කිරීමට අප සංගමයේ උපරිම දායකත්වය ලබා දෙන බව ද වැඩිදුරටත් කාරුණිකව දන්වා සිටින්නෙමු. 

ස්තුතියි!‍

ආර්.එම්.එස්.කසුන් චාමර ජයසේකර

ප්‍රධාන ලේකම්

ශ්‍රී ලංකා දුම්රිය ස්ථානාධිපති සංගමය.