අස්ගිරි අනුනායක ධුරයට නාරම්පනාවේ ආනන්ද හිමියෝ පත්වෙති

අස්ගිරි මහා විහාර පාර්ශ්වයේ අභිනව අනූනායක හිමියන් වශයෙන් ධර්මාචාර්ය පූජ්‍ය නාරම්පනාවේ ආනන්ද හිමියන් එහි කාරක මහා සංඝ සභාව විසින් නිතරඟයෙන් පත්කර ගන්නා ලදී.

උන්වහන්සේ එම පදවියට පත්වීමට පෙර අස්ගිරි මහා විහාර පාර්ශවයේ නියෝජ්‍ය ලේඛකාධිකාරීී වශයෙන් කටයුතු කටයුතු කළේය.

අස්ගිරි පාර්ශ්වයේ හිටපු අනුනායක පූජ්‍ය ආනමඩුවේ ධම්මදස්සි හිමියන් අපවත්වීමෙන් අනතුරුව එහි එක් අනූනායක පදවියක් හිස් වූ අතර එම පදවියට සුදුසු ජ්‍යෙෂ්ඨ හිමිනමක් පත් කර ගැනීම සඳහා අද (28) සවස 2.45ට පමණ අස්ගිරි පාර්ශවයේ මහානායක අතිපූජ්‍ය වරකාගොඩ ශ්‍රී ඤාණරතන හිමියන්ගේ ප්‍රධානත්වයෙන් එහි මහා කාරක සංඝ සභාව උපෝෂිත පුෂ්පාගාරයේදී රැස්විය.

එම අනුනායක පදවිය සඳහා පූජ්‍ය නාරම්පනාවේ ආනන්ද හිමියන් සමඟ මහියංගන රජමහා විහාරාධිපති පූජ්‍ය උරුලෑවත්තේ ධම්මරක්ඛිත හිමියන්ද ඉදිරිපත් වන බවට සඳහන් වුවද පසුව කාරකමහා සංඝ සභාව විසින් නිවේදනය කරනු ලැබූයේ පූජ්‍ය උරුලෑවත්තේ ධම්මරක්ඛිත හිමියන් විසින් පූජ්‍ය නාරම්පරාවේ ආනන්ද හිමියන්ගේ නම අනුනායක පදවිය සඳහා යෝජනා කළ බවයි.

ඒ අනුව අද (28) සවස 4.45 ට පමණ අස්ගිරි මහා විහාර පාර්ශ්වයේ මහා කාරක සංඝ සභාව විසින් නිවේදනය කරනු ලැබූයේ එම උත්තරීතර පදවිය සඳහා පූජ්‍ය නාරම්පරාවේ ආනන්ද හිමියන් නිතරඟයෙන් තේරී පත් වූ බවයි.