අයහපත් කාලගුණය හැටන් ඩිපෝවේ ආදායම ලක්ෂ 23කින් පහළ දමයි

මධ්‍යම කදුකරයේ බටහැර බෑවුම් ප්‍ර දේශවල පවතින දැඩි අයහපත් කාලගුණය සහ ප්‍රධාන මාර්ගවල රථවාහන ගමනා ගමනයට බාධා ඇති වීමෙන් හැටන් ලංගම ඩිපෝවේ දෛනික ආදායම රු.ලක්ෂ 33 සිට රු.ලක්ෂ 10-12ත් දක්වා පහළ බැස ඇති බව හැටන් ලංගම ඩිපොවේ කලමණාකරු පාලිත විරසූරිය මහතා පැවසීය.

මාධ්‍යට විශේෂ ප්‍රකාශයක් කරමින් ඩිපෝ කළමණාකාරවරයා කියා සිටියේ, සාමාන්‍ය දිනවල තම ඩිපෝව මගින් දුර සහ කෙටි දුර බස් රථ 75ක් ධාවනයට එක් කරන බවයි.

එම අවස්ථාවල මගීන් 18000-26000ක් පමණ තම ඩිපෝවේ බස් රථවල ගමන් කලද පවතින දැඩි වර්ෂාවත් සමග ගත වූ 03/04/05 යන තෙදින තුල දිනකට මගීන් 9218 – 10000ත් අතර ප්‍රමාණයක් ගමන් කිරිම නිසා මෙම ආදායම් තත්වය පහළ වැටී ඇති බවයි ඩිපෝ කලමණාකාරවරයා කියා සිටියේ.

පවතින අයහපත් කාලගුණයත් සමග පාසල් නිවාඩු ලබා දීම, මගීන් නිවෙස්වලින් බැහැර නොවීම හේතුවෙන් මෙම මගීන් සංඛ්‍යාව අඩු වී ඇති බවයි.

තවද, තම ඩිපෝවේ සේවකියන් 328 දෙනෙකු සේවය කරන බවත්, ඔවුන්ට මේ මස වැටුප ගෙවීමට අවශ්‍ය රු. ලක්ෂ 138ක පමණ මුදල මේ වන විට උපයාගෙන ඇති බවද ඩිපෝ කළමණාකාරවරයා වැඩි දුරටත් පැවසීය.