අපරාධ රැසකට සම්බන්ධ සැකකරුවෙක් ඔහුගේ බිරිඳත් සමගම අල්ලයි

2026.03.11 වන දින අළුයම තංගල්ල ගොන්නෝරුව ප්‍රදේශයේදී අපරාධ නිවාරණ මාර්ග බාධක රාජකාරි යෙදී සිටි හම්බන්තොට පොලිස් ස්ථානයේ නිලධාරින් කණ්ඩායමක් විසින් සැකකටයුතු ජිප් රථයක් නවතා පරීක්ෂා කර ඇත. 

 

එහි රියැදුරු සහ කාන්තාවක් සිට ඇති අතර රියැදුරුට වලංගු රියැදුරු බලපත්‍රයක් තිබී නොමැති අතර ඔහු විසින් පොලිස් නිලධාරින් වෙත හැඳුනුම්පතක් ලබාදී ඇත. එය ව්‍යාජව සකස් කරන ලද්දක් බවට නිලධාරින්ට තහවුරු වූ  බැවින් එම පුද්ගලයා සහ කාන්තාව පරීක්ෂා කර ඇත. එහිදී පුද්ගලයා සන්තකයේ තිබී හෙරොයින් ග්‍රෑම් 21 මිලිග්‍රෑම් 750 ක් සහ කාන්තාව සන්තකයේ තිබී හෙරොයින් ග්‍රෑම් 05 මිලිග්‍රෑම් 600 ක්  සොයාගෙන ඇති අතර සැකකරු හා සැකකාරිය ජිප් රථය සමඟ අත්අඩංගුවට ගෙන ඇත.

 

සැකකරු වයස අවුරුදු 34 ක් සහ සැකකාරිය වයස අවුරුදු 33 ක් වන තණමල්විල හා වීරවිල ප්‍රදේශයේ පදිංචි අඹුසැමි යුවළකි.

 

සැකකරු සම්බන්ධව සිදුකළ විමර්ශනයේදී 2016 වර්ෂයේ සූරියවැව පොලිස් වසමේදී ද්විත්ව මනුෂ්‍ය ඝාතනයක් සිදුකිරීමේ අපරාධයකට සැකකරුවෙකු බවත්, 2019 වසරේදී තණමල්විල පොලිස් වසමේදී වෙඩිතබා ද්විත්ව මනුෂ්‍ය ඝාතනයක් සිදුකිරීමේ අපරාධයක් සම්බන්ධව අත්අඩංගුවට පත්ව ගරු අධිකරණයෙන් ඇප ලබා සිටින සැකකරුවෙකු බවත් දැනට සිදු කරන ලද විමර්ශනයේදී අනාවරණ වී ඇත. 

 

එම අපරාධ සිදුකිරීමෙන් පසු සැකකරු මෙලෙස ව්‍යාජ හැඳුනුම්පතක් සකස් කර වෙනත් නමකින් පෙනී සිට ඇති බවට අනාවරණය වී ඇත. එමෙන්ම මොහු දැනට විදෙස්ගතව සිටින මත්ද්‍රව්‍ය ජාවාරම්කරුවෙකු සමඟ සම්බන්ධතා පවත්වන  බවට හා දකුණු පළාත තුල මත්ද්‍රව්‍ය බෙදාහැරීම සිදු කරන පුද්ගලයෙකු බවට  ද අනාවරණ වී ඇත.

 

හම්බන්තොට පොලිස් ස්ථානය විසින් වැඩිදුර විමර්ශන සිදුකරනු ලබයි