අන්තර්ජාල මූල්‍ය අපරාධවලට භාවිත කරන උපකරණ සමග ඉන්දුනීසියානුවන් 9ක් අල්ලයි

මෙරට තුළ අන්තර්ජාලය භාවිතා කරමින් මූල්‍ය අපරාධ කිරීම යොදා ගන්නා රුපියල් ලක්ෂ පහලොවක් වටිනා විද්‍යුත් සන්නිවේදන උපකරණ තොගයක් සමග විදේශීය  ගුවන් මගීන් 09 දෙනෙකු , කටුනායක ගුවන් තොටුපොළ පැමිණීමේ පර්යන්තයේ කිසිවක් ප්‍රකාශ කිරීමට නොමැති " හරිත මාවත " (Green Channel ) ඔස්සේ පිට වී යාමට තැත් කරමින් සිටියදී , 04/02 දින අලුයම ගුවන් තොටුපොළ රේගු නිලධාරීන් පිරිසක් අත් අඩංගුවට ගෙන තිබේ .

මොවුන් ඉන්දුනීසියානු ජාතික තරුණ ගුවන් මගීන් පිරිසකි.ඔවුන් 04/02 දින අලුයම 12.50 ට සිංගප්පූරු ගුවන් සේවයේ එස්.කිව්.- 468 දරන ගුවන් යානයෙන් සිංගප්පූරුවේ සිට කටුනායක ගුවන් තොටුපොළ වෙත පැමිණ තිබුණි .

ඔවුන් විසින් රැගෙන ආ ගමන් මලු තුළ පාවිච්චි කරන ලද නවීනතම ජංගම දුරකථන 70 ක් , කුඩා පරිගණක ( Mini Computer ) 08 ක් , සිම් කාඩ් පත් 54 ක් ද සගවා ගෙන තිබුණි .

කටුනායක ගුවන් තොටුපොළ රේගු නිලධාරීන් , ශ්‍රී ලංකා පොලිසියේ අදාල අංශ සමග ඒකාබද්ධව මේ පිළිබද වැඩිදුර විමර්ශන කටයුතු සිදු කරමින් සිටිති .