අධි ආරක්ෂක කලාප ගැසට්ටුවට එරෙහිව සජබ ශ්‍රේෂ්ඨාධිකරණයට

ජනාධිපති මන්දිරය ඇතුළුව කොළඹ නගරයේ ස්ථාන කිහිපයක් අධි ආරක්ෂක කලාප වශයෙන් නම්කරමින් ජනාධිපතිවරයා විසින් නිකුත්කර තිබෙන ගැසට් නිවේදනය බලරහිත කරන්නැයි ඉල්ලා අද (28දා)  සමගි ජනබලවේගය ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කළේය.

එම පක්ෂයේ පාර්ලිමේන්තු මන්ත්‍රීවරුන් වන හර්ෂණ රාජකරුණා සහ මුජිබර් රහුමාන් යන මහත්වරුන් විසින් එම පෙත්සම ඉදිරිපත් කර තිබේ.

එහි වග උත්තරකරුවන් ලෙස නීතිපති, ආරක්ෂක ලේකම් ඇතුළු පිරිසක් නම්කර ඇත.

රාජ්‍ය රහස් පනත යටතේ එම ගැසට් නිවේදනය නිකුත්කර ඇතැයි පෙන්වා දුන් පෙත්සම්කරුවන් අදාළ පනත යටතේ එවැනි නියෝගයක් නිකුත් කිරීමට ජනාධිපතිවරයාට බලයක් නොමැති බව ද සඳහන් කළේය.