ගම ගොඩනැගීමට නම් ග්රාමීය ආර්ථිකය සහ ජනතා අවශ්යතා හඳුනාගනිමින් බැංකු සේවා ක්රියාත්මක විය යුතු බව ජනාධිපති ගෝඨාභය රාජපක්ෂ මහතා අවධාරණය කරයි.
පිට රටවලින් පැමිණ කර්මාන්තශාලා අරඹන තෙක් නොසිට අපනයන කෘෂිකර්මාන්තය සංවර්ධනය කිරීම කාලීන අවශ්යතාවක් බව ජනාධිපතිවරයා කියා සිටී. කර්මාන්ත බිහි වීම පමණක් සංවර්ධනය නොවන බව පෙන්වා දෙන ජනාධිපතිවරයා කෘෂිකර්මාන්තය කේන්ද්ර කරගනිමින් ග්රාමීය ව්යවසායකත්වය වර්ධනය කළ යුතු බව පවසයි.
ප්රාදේශීය සංවර්ධන බැංකුවේ වත්මන් ක්රියාකාරීත්වය සහ ඉදිරි සැලසුම් පිළිබඳව අද (02) දහවල් ජනාධිපති කාර්යාලයේ පැවති සාකච්ඡාවේදී මේ අදහස් පළ කෙරිණ.
අවශ්යතා නිවැරදිව හඳුනාගෙන කෘෂිකර්මාන්තය දියුණු කිරීමෙන් ආර්ථික සංවර්ධනය අත් කරගැනීම රජයේ අරමුණකි. ඒ සඳහා ආර්ථිකය ගොඩනගන ආකාරය පහළ සිට බැලීමේ වැදගත්කම ද රාජපක්ෂ මහතා පෙන්වා දුන්නේය.
වාණිජ බැංකු ණය සම්පාදනයේදී නිෂ්පාදන ක්ෂේත්රයට වඩා වෙළෙඳ අංශ කෙරෙහි වැඩි අවධානයක් යොමු කරයි. සම්ප්රදායට සීමා නොවී ගොවීන් නිෂ්පාදනයට දිරිගන්වමින් ක්රියාකිරීම ප්රාදේශීය සංවර්ධන බැංකුවේ වගකීමකැයි ජනාධිපතිවරයා සඳහන් කළේය.
කෘෂි භෝග ආනයනයට ඉඩ නොතබා උඳු, කුරක්කන්, මුං ඇතුළු ධාන්ය වගා දිරිගැන්වීමේ අවශ්යතාවද අවධාරණය කෙරිණ. ඒ ඒ ප්රදේශයට ඉලක්ක නියම කරමින් ගොවියා දිරිගැන්වීමට අවශ්ය සහාය, බැංකුව ගමට ගෙනයාමෙන් තමා අපේක්ෂා කරන ඉලක්කය බව ද ජනාධිපතිවරයා පැවසීය.
දීර්ඝ කාලීනව ගෙවීමේ පදනම මත මහා පරිමාණ වශයෙන් ණය ගෙන ගෙවීම පැහැර හරින අයට එරෙහිව තදින් ක්රියාකළ යුතු බව සඳහන් කළ ජනාධිපතිවරයා රාජ්ය බැංකුවලට අයවිය යුතු ණය අයකරගැනීමේ ක්රමවේදයක් සැකසීමේ අවශ්යතාව ද අවධාරණය කළේය.
ජනාධිපති ලේකම් පී.බී. ජයසුන්දර, මුදල් ලේකම් එස්.ආර්. ආටිගල, මහ බැංකුවේ අධිපති මහාචාර්ය ඩබ්.ඩී. ලක්ෂ්මන්, ප්රාදේශීය සංවර්ධන බැංකුවේ සභාපති මහින්ද සාලිය, සමාන්යාධිකාරී ටී. කූහන් යන මහත්වරු සහ අධ්යක්ෂ මණ්ඩල සාමාජිකයෝ සාකච්ඡාවට එක්ව සිටියහ.