අපිව ඝාතනය කිරීමේ සැලැස්මක් ක්‍රියාත්මකයි

මදුරාසියෙන් බෝට්ටුවෙන් එනවා ඇවිත් මෙහෙ අවශ්‍ය ඝාතනය කරනවා, ආපහු බෝට්ටුවෙන් යනවා

තමා ඇතුළු යහපාලන ආණ්ඩුවේ පිරිසක් ඝාතනය කිරීමේ සැලැස්මක් අනාවරණය වී ඇති බවත්, ජීවිතය පිළිබඳ විශාල තර්ජනයත් තිබෙන බවත් සම කැබිනට් ප්‍රකාශක සෞඛ්‍ය හා පෝෂණ දේශීය වෛද්‍ය අමාත්‍ය රාජිත සේනාරත්න මහතා පැවසීය.

පසුගිය ආණ්ඩුවේ ප්‍රබල නිළධාරියෙකු වූ ගාමිණී සෙනරත් මහතාගේ රියදුරා එම ඝාතන සැලසුම පිළිබඳ සියලුම කරුණු අනාවරණය කර ඇති බවත් ඔහු සඳහන් කළේය.හෙතෙම මේ බව පැවසුවේ ඊයේ (11දා) කැබිනට් තීරණ දැනුම්දීමේ මාධ්‍ය හමුවට එක්වෙමිනි. 

ඝාතනය සිදුකරන තැනැත්තා මදුරාසියේ සිට පැමිණ අදාළ පුද්ගලයන් ඝාතනය කර නැවත මදුරාසියටම පලායාමේ සැලසුමක් පැවති බවත්, ඒ හරහා මිනීමරුවා හෝ කොන්ත්‍රාත්කරුවන් කිසිදිනක සොයාගැනීමට නොහැකි වන අයුරින් එය සැලසුම් කර ඇති බවත් එම රියදුරා කරුණු අනාවරණය කළ බව අමාත්‍යවරයා කීය.

කවදාකවත් මිනීමරුවා කවුද කියලා හොයාගන්න බැහැ. ඒ නිසා මිනීමැරුමට කොන්ත්‍රාත් දුන්නේ කවුද කියලා හොයාගන්නත් බැහැ. මේ සියල්ල අද හෙළිදරව් වෙලා තියෙන්නේ. ඒ නිසා අපි සියලු දෙනාගේ ජීවිත පිළිබඳ  විශාල තර්ජනයක් තිබෙන්නේ.

මෙලෙස සැලසුම් සකස් කරන, රටේ මුදල් සොරාගත් පුද්ගලයන් 'සුදනන්' මෙන් කටයුතු කිරීම විහිළුසහගත බවද අමාත්‍යවරයා ප්‍රකාශ කළේය.
පසුගිය සමයේ සිදුවූ දූෂණ වංචා පිළිබඳ අද වනතුරු සතුටුදායක පරීක්ෂණයක් සිදුව නොමැති බැවින් අද (12දා) සිට මේ සම්බන්ධයෙන් දැඩි ක්‍රියාමාර්ග ගන්නා බවත් අමාත්‍යවරයා සඳහන් කළේය.

"මෙයාලා බොහොම වැදගත් සිල්වත් මහත්වරු වගේ තමයි කතා කරන්නේ. රටේ හොරකම් කරා මදිවට ජනතාවත් මුලාකරනවා. මොකද ඔවුන්  හිතනවා මේවා හැමදා යටපත් කරගන්න පුළුවන් ඔවුන්ගේ බලයයි මුදලුයි නිසා. තවමත් මේ හම්බ කරපු මුදල් වියදම් කරනවා. ඒ වගේම කියනවා හෙට දිනයේ බලයට එනවා කියලා. මෙහෙම තමයි ඔවුන්ගේ ගමන යන්නට බලාපොරොත්තු වෙන්නේ. නමුත් ඔවුන් වටේ හිටපු අයගේ ප්‍රකාශවලින් මේ සියල්ල හෙළිදරවු වෙලා තියෙන්නේ. ස්වභාවධර්මය විසින්ම මෙම හොරකම් හෙළිදරව් වෙලා තියෙන්නේ. 

ගාමිණී සෙනරත්ගේ රියදුරු මහත්මය කියනවා ඔවුන් අපිව ඝාතනය කරන්නට කරපු සැලසුම් ගැන. අවසානයේදී  බැරි වුණොත් අපේ මූලික පිරිසක්ව ඝාතනය කරන්න. ඒ ඝාතනය කරන හැටිත් කියලා තියෙනවා. ඒක බොහොම සිම්පල්. මදුරාසියෙන් බෝට්ටුවෙන් එනවා ඇවිත් මෙහෙ අවශ්‍ය ඝාතනය කරනවා. ආපහු බෝට්ටුවෙන් යනවා.

කවදාකවත් මිනීමරුවා කවුද කියලා හොයාගන්න බැහැ. ඒ නිසා මිනීමැරුමට කොන්ත්‍රාත් දුන්නේ කවුද කියලා හොයාගන්නත් බැහැ. මේ සියල්ල අද හෙළිදරව් වෙලා තියෙන්නේ. ඒ නිසා අපි සියලු දෙනාගේ ජීවිත පිළිබඳ  විශාල තර්ජනයක් තිබෙන්නේ. ජනාධිපතිතුමාත් ඉන්නෙ ඒ ස්ථාවරයේ. අපි යහපාලනයට එද්දිත් ඒ ජීවිත තර්ජනය දැනගෙනයි ආවෙ. අපි පැරදුණා නම් අපේ ජීවිත අවසන්. එයලගේ කල්ලිවලින්ම මෙම කරුණු අද අනාවරණය වෙනවා"යැයි පැවසීය.