ෆින්ච්ට ගෙදරදී ලැබුණ වැදගත් තරගය

ශ්‍රී ලංකා කණ්ඩායම හා ඔස්ට්‍රේලියා කණ්ඩායම අතර පැවැත්වීමට නියමිත දෙවැනි විස්සයි20 තරගය අද (19දා) ඔස්ට්‍රේලියාවේ, වික්ටෝරියා හි ජීලෝන්ග්හි සයිමන්ඩ්ස් පිටියේදී පැවැත්වීමට නියමිතය. මෙම පිටිය ඔස්ට්‍රේලියාවේදී ජාත්‍යන්තර ක්‍රිකට් තරග පැවැත්වීම සඳහා අලුතෙන්ම එක්වූ ක්‍රිකට් පිටිය වෙයි. 

එහි මේ දක්වා කිසිඳු ජාත්‍යන්තර ක්‍රිකට් තරගයක් පවත්වා නොමැත. නවසීලන්ත කාන්තා  හා ඔස්ට්‍රේලියා කාන්තා කණ්ඩායම් අතර අද (19දා) පැවැත්වීමට නියමිත විස්සයි20 තරගය පිටියේ පැවැත්වෙන පළමු ජාත්‍යන්තර කාන්තා තරගය වන අතර ඉන් පසුව ශ්‍රී ලංකා හා ඔස්ට්‍රේලියා විස්සයි20 තරගය පැවැත්විමට නියමිතය.

ඔස්ට්‍රේලියාවේ එක් කණ්ඩායමක් මේ වන විට ඉන්දියාවේ ටෙස්ට් තරගාවලියකට එක්ව සිටින හෙයින් ශ්‍රී ලංකාව හා පැවැත්වෙන විස්සයි20 තරගාවලියේදී ඔස්ට්‍රේලියා කණ්ඩායමේ නායකත්වයට පත්කරනු ලැබුවේ ආරම්භක  පිතිකරු ආරොන් ෆින්ච්ය.

ෆින්ච් වික්ටෝරියා ප්‍රාන්ත කණ්ඩායම නියෝජනය කරන අතර ජීලෝන්ග් පිටිය වික්ටෝරියා ප්‍රාන්ත කණ්ඩායමේ මව් ක්‍රීඩාංගණයද වෙයි. එම පිටියේ පැවැත්වෙන පළමු ජාත්‍යන්තර තරගයේදී ඔස්ට්‍රේලියානු කණ්ඩායම මෙහෙයවීමේ වගකීම ෆින්ච්ට ලැබී තිබේ. ඒ අනුව වික්ටෝරියාව නියෝජනය කරන ෆින්ච්ට ජීලෝන්ග් පිටියේ ලැබෙන තරගය වඩාත් වැදගත් තරගයක් වෙයි.