සුසන්ත බොතේජු ස්නූකර් ශූරතාව දිනයි

දහ අට වැනි වරටත් කොළඹ වයි.එම්.සී.ඒ. (තරුණ ක්‍රිස්තියානි සම්මේලන) ක්‍රීඩා සමාජයේ සුසන්ත බොතේජු ශූරතාව දිනාගනිමින් යූ.ඩබ්. සුමතිපාල අනුස්මරණ කුසලානය සඳහා පැවැති 63 වැනි ජාතික ශූරතා ස්නූකර් තරගාවලිය පසුගියදා (19දා) කොළඹ ඔටර්ස් ක්‍රීඩා සමාජ බිලියඩ් ක්‍රීඩාගාරයේදී නිමාවට පත් විය.

තරකරුවන් තුන්සියයකට ආසන්න ප්‍රමාණයක් සහභාගී වූ මෙම තරගාවලියේ අවසන් තරගයේදී සුසන්ත බොතේජු අතින්  ලකුණු 7-3 ක්  ලෙස පරාජයට පත්වූයේ, කොළඹ මුවර්ස් ක්‍රීඩා සමාජයේ එස්.එච්.එම්. අස්ලම්ය.

ජයග්‍රාහී සුසන්ත බොතේජු තරගාවලියේ අවසන් පූර්ව වටයේදී  යුද හමුදා ක්‍රීඩා සමාජයේ එම්.එම්. මුබීන් තරග වට 6-3 ක් ලෙසින් පරාජයට පත් කිරීමට සමත් වූ අතර අස්ලම් විසින් කොළඹ වයි.එම්.සී.ඒ. ක්‍රීඩා සමාජයේ එස්.එම්. සුල්ෆිකර් තරග වට  6-2 ක් ලෙස පරාජයට පත්කළේය.

තරගාවලියේ ජයග්‍රාහකයන් සඳහා ත්‍යාග ප්‍රදානය සුමති සමූහ ව්‍යාපාරයේ කළමනාකරණ අධ්‍යක්ෂ ජගත් සුමතිපාල මහතා අතින් සිදු විය.

මෙම තරගාවලිය ශ්‍රී ලංකා බිලියඩ් හා ස්නූකර් සම්මේලනයේ පූර්ණ අධීක්ෂණය යටතේ පැවැති අතර, මෙහි ප්‍රධාන අනුග්‍රාහකයා වූයේ සුමති සමූහ ව්‍යාපාරයයි.

ඡායාරූප ඒෂාන් ප්‍රනාන්දු