ශ්‍රී ලංකාව තවත් ලකුණු 119ක් ඉදිරියෙන්

සත්කාරක බංග්ලාදේශ කණ්ඩායම හා සංචාරක  ශ්‍රී ලංකා කණ්ඩායම අතර බංග්ලාදේශයේ පැවැත්වෙන පළමු ටෙස්ට් තරගයේ සිවුවැනි දිනය නිමා කරන විට සිය දෙවැනි ඉනිම ක්‍රීඩා කරන බංග්ලාදේශ කණ්ඩායම කඩුලු තුනකට ලකුණු 81ක් රැස්කරගෙන සිටියි.

ඒ අනුව ශ්‍රී ලංකා පළමු ඉනිමට වඩා බංග්ලාදේශ කණ්ඩායම කඩුලු හතක් අතැතිව තවත් ලකුණු 119ක් පසුපසින් සිටියි.

මොමිනුල් හක් (18) නොදැවී පිටියේ රැඳී සිටින අතර තමීම් ඉක්බාල් (41), ඉම්රුල් කායෙන් (19), මුෂ්ෆිකාර් රහීම් (02) දැවී ගිය පිතිකරුවෝ වෙති.

රංගන හේරත්, ඩිල්රුවන් පෙරේරා හා ලක්ෂාන් සඳකැන් එක් කඩුල්ල බැගින් දවාගත්හ.

බංග්ලාදේශය පළමු ඉනිමට සියල්ලන්ම දැවී ලකුණු 513ක් රැස්කළ අතර පිළිතුරු ඉනිම ක්‍රීඩා කළ ශ්‍රී ලංකා කණ්ඩායම කඩුලු 9ට ලකුණු 713ක් රැස්කරමින් ඉනිම අත්හිටුවීය.