විලියම් කුමාරයාටත් අප්‍රේල් මාසයේදී කොරෝනා තිබිලා

මෙම වසර මුලදී කේම්බ්‍රිජ් ආදිපාදවරයා වන විලියම් කුමාරයාටත් කොවිඩ් -19 ආසාදනය වී සිට ඇති බව මාලිගයේ ආරංචි මාර්ග උපුටා දක්වමින් විදෙස් වාර්තා පවසයි.

සිය පියා වූ චාල්ස් කුමරු ධනාත්මක වීමෙන් පසුව ඔහු අප්‍රේල් මාසයේදී වෛරසයට ධනාත්මක පරීක්ෂණයක් සිදුකර ඇති බව විශ්වාස කෙරෙයි.

මෙම පුවත මුලින්ම හෙළි කළ බ්‍රිතාන්‍යයේ සන් පුවත්පතට අනුව, 38 හැවිරිදි විලියම් කුමරු විසින් රට සහ ජනතාව බිය ගැන්වීම වළක්වා ගැනීම සඳහා ඔහුගේ රෝග විනිශ්චය පෞද්ගලිකව තබා ගැනීමට කටයුතු කර ඇත.

කෙසේ වෙතත් විලියම් කුමරුගේ කාර්යාලය සහ නිවස වන කෙන්සිංටන් මාලිගය නිල වශයෙන් මේ සම්බන්ධයෙන් අදහස් දැක්වීම ප්‍රතික්ෂේප කළේය.

බ්‍රිතාන්‍ය සිංහානයට හිමිකම් කියන ලැයිස්තුවේ දෙවැනියා වන විලියම් කුමරු වෛරසයට ධනාත්මක වූ විට, මාලිගාවේ වෛද්‍යවරුන් විසින් ඔහුට ප්‍රතිකාර කර ඇති අතර, රජයේ මාර්ගෝපදේශ අනුගමනය කරමින් නොර්ෆොක්හි පිහිටි පවුලේ නිවස වන ඇන්මර් ශාලාවේදී ඔහු හුදෙකලා වී ඇත.

චාල්ස් කුමරු මාර්තු මාසයේදී නව කොරෝනා වෛරසයට ධනාත්මක වූ අතර, මෘදු රෝග ලක්ෂණ පෙන්නුම් කිරීමෙන් පසු ස්කොට්ලන්තයේ ස්වයං හුදකලාව ගත කළේය. 71 හැවිරිදි වේල්ස්යේ කුමරු පසුව පැවසුවේ එය සැහැල්ලුවෙන් ඉවත්ව ගිය බවය.