වියට්නාමයේ සංචාරක බෝට්ටුවක් පෙරළී 37ක් මරුට

අයහපත් කාලගුණය හේතුවෙන් වියට්නාමයේ සංචාරක බෝට්ටුවක් පෙරළීමෙන් අවම වශයෙන් පුද්ගලයින් 37 දෙනෙකු මිය ගොස් ඇති අතර කිහිප දෙනෙකු තවමත් අතුරුදහන් වී ඇත.

මෙම සිදුවීම සිදුව ඇත්තේ රටේ උතුරේ ජනප්‍රිය සංචාරක ගමනාන්තයක් වන හා ලොන්ග් බොක්කෙහි ය.

බොහෝ මගීන් හැනෝයි අගනුවර සිට පැමිණි වියට්නාම පවුල් බව වාර්තා වේ.

දිවි ගලවා ගත් අය සෙවීමේ කටයුතුවලට තද වර්ෂාව බාධාවක් වී ඇති බව ගලවා ගැනීමේ කණ්ඩායම් පවසන නමුත් මේ වන විට පුද්ගලයින් 11 දෙනෙකු ජලයෙන් ඉවත් කර ඇත.

වොන්ඩර් සීස් නම් බෝට්ටුව හදිසි කුණාටුවකට මුහුණ දීමෙන් පසු පෙරළෙන විට පුද්ගලයින් 53 දෙනෙකු රැගෙන ගිය බව වියට්නාම දේශසීමා ආරක්ෂකයින් සහ නාවික හමුදාවේ ප්‍රකාශයක් පවසයි.