ඇෆ්ගනිස්තානයේ තලේබාන් භාරයේ සිටි එකම අමෙරිකානු සෙබලා නිදහස්

ඇෆ්ගනිස්තානයේ තලේබාන් සංවිධානය විසින් වසර පහකට වැඩි කාලයක් රඳවාගෙන සිටි ඇමෙරිකානු සොල්දාදුවා නිදහස් කර ඇති බව වාර්තා වෙයි.

තලේබාන් සැකකරුවන් පස් දෙනෙකු නිදහස් කිරීමේ කොන්දේසියට යටත්ව මේ ආකාරයෙන් ඇමෙරිකානු සෙබලාවට නිදහස ලබාදී ඇති බව කියැවෙයි.

28 හැවිරිදි බෝව් බර්ග්ඩාල් නමැති මෙම අමෙරිකානු සෙබලා හොඳ සෞඛ්‍ය තත්ත්වයෙන් ඇමෙරිකානු හමුදාව වෙත භාරදුන් බව පවසයි.

ඒ අනුව, කියුබාවේ පිහිටි ඇමෙරිකානු ග්වන්තනාමෝ බේ සිරකඳවුරේ සිටි තලේබාන් සැකකරුවන් 5 දෙනෙකු නිදහස් කර තිබේ.

එම පිරිස කටාර් රාජ්‍යයේදී මුදා හැර ඇති බව කියැවෙයි.

ඇෆ්ගනිස්තානයේ තලේබාන් සටන්කාමීන් විසින් රඳවාගෙන සිටි එකම ඇමෙරිකානු සෙබලා බර්ග්ඩාල් බවද ඇමෙරිකානු හමුදාව පවසයි.