47ක් බිලිගත් ගුවන් අනතුරට පෙර එළුවෙකු බිල්ලට දීලා

ජීවිත 47ක් බිලිගනිමින් අනතුරට පත් පාකිස්තාන ජාතික ගුවන් සේවයේ ATR-42 යානය ගුවන්ගත වීමට පෙර එහි අසුභ දුරුවීම සඳහා ගුවන් පථයේදී එළුවෙකු බිලිදී ඇති බව වාර්තා වෙයි.

කෙසේ වෙතත්, එසේ එළුවෙකුගේ ගෙල සිඳ අසුබ දුරුකරමින් ගුවන්ගත වූ යානය, පාකිස්තාන ඉතිහාසයේ වඩාත් දරුණුතම ගුවන් ඛේදවාචකයකට ගොදුරුවීම දෛවයේ සරදමක් යැයි ගුවන් තොටුපොළ කාර්ය මණ්ඩලය එළුවාගේ ගෙල සිඳින ඡායාරූප දුටු බොහෝ පිරිස් පවසා සිටිති.

පසුගිය දෙසැම්බර් 07 වැනිදා එරට අභ්‍යන්තර ගුවන් ගමනකදී මෙම අනතුර සිදුවූ අතර, එම ගුවන් අනතුරින් යානයේ ගමන්ගත් සියලු දෙනා ජීවිතක්ෂයට පත්වූහ.

පාකිස්තාන ජාතිකයන් මේ ආකාරයෙන් අසුබ දුරුවීම සඳහා කළු එළුවන් ගෙල සිඳ මරාදමන බව කියැවෙයි.

කෙසේ වෙතත්, මෙම ඡායාරූප සැබෑ ඡායාරූප බව තහවුරු වීමෙන් අනතුරුව එරට ගුවන් සේවයේ ප්‍රකාශකයෙකු කියා තිබුණේ, මෙම බිලිදීම ගුවන් සේවයේ උවමනාව මත නොව, එම කාර්ය මණ්ඩලයේ උවමනාව මත සිදුවූවක් බවයි.

එමෙන්ම, ජාතික ගුවන් සේවයේ කළමනාකාරීත්වය මේ සම්බන්ධයෙන් දැනුම්වත්ව නොසිටි බවද එම ප්‍රකාශකයා පවසා තිබේ.

මෙම සිදුවීම වාර්තා කර තිබූ එරට මාධ්‍යයද පවසා තිබුණේ, ජාතික ගුවන් සේවය එළුවෙකු බිලිදීම හරහා දැඩි නින්දාවකට ලක්ව ඇති බවයි. එමෙන්ම, තවත් මාධ්‍ය වාර්තාවල තිබුණේ, ගුවන් සේවය පිළිබඳ විශ්වාසය බිඳ වැටීම හා එහි ආරක්ෂාව පිළිබඳව පවතින බියද මේ ආකාරයේ බිලි පූජා පැවැත්වීමෙන් ප්‍රකට වන බවයි.

පාකිස්තාන ජාතික ගුවන් සේවය සතුව ATR-42 යානා 11ක් පවතින අතර, පසුගිය 07දා හවේලියන් පළාතේදී අනතුරට ලක්වූයේ ඉන් එක් ගුවන් යානයකි.