ට්‍රම්ප්-කිම්ගේ මඟුල් කපුවා පැසිපන්දු ක්‍රීඩක ඩෙනිස්ද?

ඇමෙරිකානු ජනපති ඩොනල්ඩ් ට්‍රම්ප් සහ උතුරු කොරියානු ජනපති කිම් ජොන්ග්-උන් අතර හමුවේ මඟුල් කපුකම සිදුකර ඇත්තේ පාපන්දු තරුවක් වන ඩෙනිස් රොඩ්මන් විය හැකි බවට නිව්යෝක් පෝස්ට් විසින් කළ හෙළිදරුව්වක් සමග මේ වනවිට ඒ පිළිබඳ කතාබහක් සිදුවෙමින් පවතී.

මෙම හෙළිදරව්ව සම්බන්ධයෙන් යම් විශ්වාසයක් තැබිය හැකි වන්නේ ඇමෙරිකානු ජනපති ඩොනල්ඩ් ට්‍රම්ප් මෙන්ම, උතුරු කොරියානු නායක කිම් ජොන්ග්-උන් සමග සමීප ඇසුරක් පැවැත්වීමට භාග්‍ය ලද අයෙකු ලෙස ඩෙනිස් රොඩ්මන් සැලකෙන නිසාය.

එකල ඩොනල්ඩ් ට්‍රම්ප් විසින් ඉදිරිපත් කළ රූපවාහිනී රියැලිටි වැඩසටහනක් වන ඇප්‍රෙන්ටිස් වෙත දෙවරක් සහභාගී වී ඇති ඩෙනිස්, පස් වතාවක් උතුරු කොරියාවේ සංචාරය කර තිබේ. එමෙන්ම, ව්‍යාපාරික සබඳතා ඇතිකර ගැනීම සම්බන්ධයෙන් ඩොනල්ඩ් ට්‍රම්ප් විසින් රචනා කර ඇති 'දි ආට් ඔෆ් ද ඩීල්' කෘතියේ පිටපතක්ද ඩෙනිස් විසින් උතුරු කොරියානු නායකයාට පිළිගන්වා තිබුණි.

එමෙන්ම, ඩෙනිස් යනු මෙම නායක දෙපළ සම්බන්ධයෙන්ම විවෘතව අදහස් ප්‍රකාශ කරන්නෙකු මෙන්ම, ඔවුන් දෙදෙනාගේම ගෞරවය හා ආදරය දිනූ චරිතයක් බවද නොරහසකි. එහිදී, පසුගිය වසරේ අගභාගයේදී ඇමෙරිකානු සහ උතුරු කොරියානු නායකයන් උණුසුම් යුද වාතාවරණයක් සඳහා වාග් සංග්‍රාමයකින් අරඅඳින විට ඩෙනිස් පවසා සිටියේ එය හරියට විශාල ශරීර ඇති දරුවන් දෙදෙනෙක් කවුද ශක්තිවන්තයා කියා උරගා බැලීමට කරන සෙල්ලමක් බඳු යැයි කියාය.

කෙසේ වෙතත්, ලබන ජුනි මස 12 වැනිදා සිංගප්පූරුවේදී සිදුවන ට්‍රම්ප් - කිම් හමුවට ඩෙනිස් වෙත ඇරයුමක් පවතින්නේද යන්න මෙතෙක් අනාවරණය නොවූවත්, යම් ලෙසකින් මෙම නායක දෙපළගේ ඓතිහාසික හමුවේ මඟුල් කපුකම සිදුකළේ 'ද වෝම්' යන අන්වර්ථ නාමයෙන් හැඳින්වුණු ඩෙනිස් නම්, දරුණු ලෙස බිඳ වැටී පැවති භූ දේශපාලනික සබඳතාවක් යළි එකතු කිරීම සඳහා ඔහු සිය චිත්තාකර්ෂණීය ක්‍රීඩා විලාසයෙන් ඔබ්බට තැබූ යෝද පියවරක් ලෙස මෙම අවස්ථාව සැලකිය හැකි බව දේශපාලන විචාරකයෝ පෙන්වා දෙති.