ඇමෙරිකාවේ ටෙක්සාස් හදිසි ගංවතුරින් 43ක් මරුට

ඇමෙරිකාවේ මධ්‍යම ටෙක්සාස් හි ඇතිවූ හදිසි ගංවතුරෙන් ළමුන් 15 දෙනෙකු ඇතුළුව පුද්ගලයින් 43 දෙනෙකු මිය ගොස් ඇති බව ජාත්‍යන්තර මාධ්‍ය වාර්තා කරයි. ගංවතුරෙන් දිවි ගලවාගත් අය සෙවීම සඳහා සහන සේවකයන් විශාල ප්‍රමාණයක් යොදවා තිබේ.

ක්‍රිස්තියානි තරුණ කඳවුරකින් ළමුන් 27 දෙනෙකු අතුරුදහන් වී තිබේ. සමහර දෙමව්පියන් තම දරුවාගේ මරණය සමාජ මාධ්‍ය ඔස්සේ තහවුරු කර ඇති අතර  මේ වන විට පුද්ගලයින් 850 ක් පමණ ගංවතුරින් බේරාගෙන තිබේ.

ගංවතුරෙන් ගසාගෙන ගොස් ඇති පුද්ගලයින් සොයා ගැනීමට ගලවා ගැනීමේ කණ්ඩායම් ග්වාඩලූප් ගඟ දිගේ මෙහෙයුමක් ආරම්භ කර තිබේ.

හදිසි අවස්ථාවට ප්‍රතිචාර දැක්වීම සඳහා තම පරිපාලනය පළාත් පාලන ආයතන සමඟ සමීපව කටයුතු කරන බව එක්සත් ජනපද ජනාධිපති ඩොනල්ඩ් ට්‍රම්ප් පැවසීය.

සෙවීමේ කටයුතු සඳහා සහාය වීම සඳහා ෆෙඩරල් රජය වෙරළාරක්ෂක බලකාය යොදවන බව ස්වදේශ ආරක්ෂක ලේකම් ක්‍රිස්ටි නොයම් පැවසීය.

මෙම සති අන්තයේ මධ්‍යම ටෙක්සාස් හි තවත් ගංවතුරක් ඇතිවිය හැක බවට අදාළ ආයතන විසින් අනතුරු අඟවා තිබේ.

ජාතික කාලගුණ සේවය (NWS) පැවසුවේ සෙනසුරාදා අඟල් 2 සිට 5 දක්වා (සෙන්ටිමීටර 5 සිට 12 දක්වා) වර්ෂාපතනයක් ඇතිව තිබෙන බවයි.

සිකුරාදා ජලගැල්මෙන් දැඩි ලෙස බලපෑමට ලක් වූ සමහර ප්‍රදේශවල අඟල් 10 දක්වා වර්ෂාපතනයක් ඇති ව තිබේ.