ජාතික රක්ෂණ ක්‍රමය ගැන ශ්‍රී ලංකාවට පැසසුම් හිමිවේ

සියලු පුරවැසියන් සහ දේපොළ ආවරණය වන ජාතික රක්ෂණ ක්‍රමයක් හඳුන්වාදීමට ශ්‍රී ලංකා රජය ගෙන ඇති පියවර ලෝක ආහාර වැඩසටහනේ ඇගයීමට ලක්ව ඇති බව මුදල් අමාත්‍යාංශය පවසයි.

මෙවැනි රක්ෂණ ක්‍රමයක්, හඳුන්වාදීම තුළින්, ශ්‍රී ලංකා රජය ප්‍රතිපත්ති සම්පාදනයේ ඉදිරි පියවරක් තබා ඇති බවද ලෝක ආහාර වැඩසටහන පෙන්වාදෙයි.

ලෝක ආහාර වැඩසටහනේ විධායක අධ්‍යක්ෂ එර්තරින් කසින් (Ertharin Cousin) මහත්මිය, හා මුදල් අමාත්‍ය රවී කරුණානායක මහතා අතර පැවැති හමුවකදී මේ බව අනාවරණය විය. මෙම හමුව පෙරේදා (13දා) පස්වරුවේ මුදල් අමාත්‍යාංශයේ දී පැවැත්විණි.

මෙහිදී, ඇය පෙන්වා දී ඇත්තේ ගංවතුර, නායයාම් හා වියළි කාලගුණය තුළින් ඇති වන ස්වභාවික විපතකදී ඊට තාක්ෂණික ආධාර සැපයීමට, ලෝක ආහාර වැඩසටහනට හැකිවන බවයි.

විපතට පත්වන්නන්ට රක්ෂණ ප්‍රතිලාභ බෙදාහැරීමේ දී එය විධිමත්ව පවත්වා ගැනීමට තාක්ෂණික සහය ඉතා වැදගත් බවද ඇය පෙන්වා දුන්නා ය.

සංවර්ධනය වෙමින් පවතින රටක් ලෙස ශ්‍රී ලංකාව මෙවැනි රක්ෂණ ක්‍රමයක් හඳුන්වාදීම ශ්‍රී ලාංකේය ජනතාව ලද ජයග්‍රහණයක් බව ද ලෝක ආහාර වැඩසටහන පෙන්වා දෙයි.

මෙම අවස්ථාවට ජාතික රක්ෂණ භාර මණ්ඩලයේ සභාපති මංජුල සිල්වා මහතා ද එක්ව සිටියේය.