කොටස් වෙළෙඳ පොළ සමාජ සත්කාර්යයක්

දිවයිනේ අතිශය දුෂ්කර ප්‍රදේශවල දරුවන්ගේ අධ්‍යාපන අයිතිය තවදුරටත් තහවුරු කරමින් හා එහි ගුණාත්මක භාවය ඉහළ නැංවීමට දිරිය ලබාදෙමින් අනුරාධපුර ඉතා දුෂ්කර හුදකලා පාසලක් ලෙස ප්‍රකාශයට පත්කර ඇති දිගනේගම විද්‍යාලයට පුස්තකාලයක් ලබාදීම පසුගියදා සිදුවිය.

1954 දී ස්ථාපනය කරනලද දිගනේගම විද්‍යාලය 100කට අධික ඉහළ දරිද්‍රතාවයෙන් පෙළෙන දරුවන් සඳහා 1 වසර සිට 11 වසර දක්වා අධ්‍යාපනය හැදෑරීමේ අවස්ථාව සලසා දී තිබේ. ප්‍රාථමික අධ්‍යාපනය හා ද්විතීයික අධ්‍යාපනය මෙන්ම ඉහළ අධ්‍යාපනික සම්පත්වල හිඟභාවය මෙම විද්‍යාලයට ඇති මූලිකම අභියෝගය වී තිබේ.

ඒ අනුව, කොළඹ ව්‍යාපාර වස්තු හුවමාරුව විසින් වාර්ෂිකව සිදුකරනු ලබන සිය සාමාජ සත්කාරක වැඩසටහන සඳහා උතුරුමැද පළාත් අධ්‍යාපන දෙපාර්තමේන්තුව හා එක්ව මෙම පාසලට අත්‍යාවශ්‍ය අංගයක්ව පැවති පාසල් පුස්තකාලය ලබාදීම සඳහා කටයුතු යෙදූ බව ඔවුහු පවසති. එහිදී, ගරාවැටුණු ගොඩනැගිල්ලක් නැවත පිළිසකර කරමින්, ගෘහ භාණ්ඩ, පොත් හා අනෙකුත් අත්‍යවශ්‍ය අංග රැසක් ලබාදීමට කටයුතු කළ බවද ඔවුහු පවසති.

මේ සියලු අභියෝග තිබුණත් මෙම විද්‍යාලය සෑම වසරකම පාහේ අධ්‍යයන පොදු සහතික පත්‍ර සාමාන්‍ය පෙළ විභාගයේ සාමාර්ථ ප්‍රතිශතය 80%ක පවත්වාගෙන යාමට සමත්ව තිබේ. එමෙන්ම 2012 වර්ෂයේදී උතුරුමැද පළාතේ හොඳම පරිසර හිතකාමී පාසල ලෙස සම්මානයට පාත්‍ර වී තිබේ. පාසලට මෙම සියලු ජයග්‍රහණ අත්පත් කරදීමේ පසුපස සිටින්නේ විදුහල්පතිවරයා හා අචාර්ය මණ්ඩලය බවද කොළඹ කොටස් වෙළෙඳ පොළ සිහිපත් කරයි.

මෙම අවස්ථාව පිළිබඳව අදහස් පළකරමින් කොළඹ ව්‍යාපාර වස්තු හුවමාරුවෙහි ප්‍රධාන විධායක නිලධාරී රජීව බණ්ඩාරනායක  මහතා ප්‍රකාශ කළේ, අධ්‍යාපන ආයතනයකට මූලිකව පැවතිය යුතු එහෙත් නොපැවතුණු අඩුපාඩුවක් ආමන්ත්‍රණය කිරීමට ආයතනය සමත්වූ බවත්, රටේ අධ්‍යාපනය ලැබිය යුතුම කොටස්වලට ඒ සඳහා අවශ්‍ය පහසුකම් සැපයීමෙහිලා කොළඹ ව්‍යාපාර වස්තු හුවමාරුව නිරන්තරයෙන් කැපවී සිටින බවත්ය.

දිගනේගම විද්‍යාලයේ පුස්තකාලය හා ඒ ආශ්‍රිත ක්‍රියාකාරකම් මෙන්ම පාසලේ ඉදිරි දියුණුව සඳහාද කොළඹ ව්‍යාපාර වස්තු හුවමාරුවට කළ හැකි උපරිම දායකත්වය ලබාදීමට එහි අනුරාධපුර ශාඛාව හරහා කටයුතු කරමින් සිටින බවද රජීව බණ්ඩාරනායක මහතා වැඩිදුරටත් පවසා සිටියේය.