අමතක කළ පලතුරු නැවත භාවිතයට ගැනීමට යයි

නීරෝගීමත් මතු පරපුරක් රටට දායාද කිරීමේ කර්තව්‍ය පෙරදැරිව වස විස සහිත ආනයනනික මිල අධික පලතුරු භාවිතය අමව කර, වර්තමානයේ එතරම් ආහාරයට නොගෙන අපෙන් අමතකව ගිය ඌන භාවිත පලතුරු ප්‍රචලිත කිරීමේ විශේෂ ව්‍යාපෘතියක් කෘෂිකර්ම අමාත්‍යංශය මගින් කෑගල්ල දිස්ත්‍රික්කය තුළ ආරම්භ කිරීමට සැලසුම් කර ඇති බව වාර්තා වෙයි.

මේ යටතේ කජු පුහුලන්, වීර, පලු, මොර, දං, මාදං, බෝවිටියා, වෙරළු, ලාවුළු, ජම්බු, පිනි ජම්බු, නමිනම්, ලොවි, උගුරැස්ස, බිලිං, කාමරංකා, නෙල්ලි, හිඹුටු, ඇඹුල් පේර, ඇටඹ, මී අඹ, වැල වරකා, අනෝදා, වැල් අනෝදා යන පලතුරු ප්‍රචලිත කෙරෙනු ඇති බව පැවසෙයි.

කෑගල්ල දිස්ත්‍රික්කයේ සෑම ග්‍රාම නිලධාරී වසමක්ම ආවරණය වන පරිදි දිවි නැගුම ව්‍යාපෘතිය සාර්ථකව සංවර්ධනය වූ පවුල් ඒකක 10 බැගින් තෝරා මෙම ඌන භාවිත පලතුරු පැළ බෙදා දීම සිදු කරන බව කියැවෙයි.

ඒ අනුව, කෘෂිකර්ම දෙපාර්තමේන්තුව මගින් පැළ ලබාදෙන අතර, පළාත් කෘෂිකර්ම අමාත්‍යංශය මගින් වගාකරුවන් පාසල් හා ආයතන වෙත මෙම ව්‍යාපෘතිය හඳුන්වා දෙනු ලබයි.

එසේම කෑගල්ල දිස්ත්‍රික් ලේකම් කාර්යාලය මගින් මේ සම්බන්ධව ආයතන ප්‍රධානීන් දැනුවත් කිරීම සිදු කරයි.

ආරම්භයේ දී පුද්ගලයින් හා ආයතන 825ක් මෙම ව්‍යාපෘතිය හා බද්ධ වන බවත්, මේ සඳහා රු.ලක්ෂ 15ක පමණ ප්‍රතිපාදන වෙන් වී ඇති බවත් පැවසෙය්.

කෘෂිකර්ම නියෝජ්‍ය අමාත්‍ය වයි.ජී. පද්මසිරි මහතාගේ සංකල්පයක් අනුව මෙම ව්‍යාපෘතිය ක්‍රියාත්මක වේ.