ආසියාවේ වර්ධන ජාලයන් සමඟ ශ්‍රී ලංකාව සම්බන්ධ කිරීමට නම්

ආසියානු කලාපය ගෝලීය ආර්ථික ක්‍රියාකාරකම්වල වර්ධනය වන කොටසක් අඛණ්ඩව නියෝජනය කරමින් සිටින පසුබිමක, කලාපීය වෙළෙඳ ජාලයන්, සැපයුම් දාමයන් සහ ආර්ථික කොරිඩෝ සමඟ සබැඳියාවන් ශක්තිමත් කර ගැනීමට ශ්‍රී ලංකාවට වැදගත් අවස්ථාවක් උදාවී තිබේ. ආයෝජන ආකර්ෂණය කර ගැනීමට, වෙළෙඳපොළ පුළුල් කිරීමට සහ කලාපීය වටිනාකම් දාමයන් තුළ රටේ ස්ථාවරය ශක්තිමත් කර ගැනීමට මෙම සම්බන්ධතා වඩාත් හොඳින් භාවිත කළ හැකි ආකාරය පිළිබඳව සාකච්ඡා කිරීම, ලංකා වාණිජ මණ්ඩලය විසින් සංවිධානය කරනු ලබන 2026 ශ්‍රී ලංකා ආර්ථික හා ආයෝජන සමුළුවේ  (SLEIS 2026) ප්‍රධාන මාතෘකාවක් වනු ඇත. මෙම සමුළුව 2026 ඔක්තෝබර් 12-13 දිනවලදී පැවැත් වීමට නියමිතය.

"ආසියාවේ වර්ධන ජාලයන් සමග ශ්‍රී ලංකාව සම්බන්ධ කිරීම: වෙළෙඳපොළ, කොරිඩෝ සහ වටිනාකම් දාම" (Linking Sri Lanka to Asia’s Growth Networks: Trade, Corridors, and Value Chains) යන තේමාව යටතේ පැවැත්වෙන මෙම සැසිවාරය මඟින්, පුළුල් ආසියානු ආර්ථිකය සමඟ ශ්‍රී ලංකාවේ ඒකාබද්ධතාව ගැඹුරු කිරීමට සහ කලාපීය මෙන්ම ගෝලීය වෙළඳපොළවල් සමඟ ශක්තිමත් සබැඳියාවන් ගොඩනඟා ගැනීමට පවතින අවස්ථා පරීක්ෂා කරනු ඇත.

සැසියේ ප්‍රධාන දේශනය ස්ටෑන්ඩර්ඩ් චාටර්ඩ් බැංකුවේ ඉන්දියා සහ දකුණු ආසියානු ප්‍රධාන විධායක නිලධාරී පී.ඩී. සිං මහතා විසින් පවත්වනු ලැබේ.

ඉන් අනතුරුව පැවැත්වෙන මණ්ඩල සාකච්ඡාව සඳහා සම්පත් දායකයන් ලෙස ශ්‍රී ලංකාවේ ජපාන තානාපති අකියෝ ඉසොමාටා, ටොයෝටා ලංකා (පෞද්ගලික) සමාගමේ සභාපති මසාඅකි කවාබාටා සහ මලිබන් බිස්කට්ස් (පෞද්ගලික) සමාගමේ සමූහ ප්‍රධාන විධායක නිලධාරී රවි ජයවර්ධන යන මහත්වරුන් සම්බන්ධ වීමට නියමිතය. සැසිවාරය වෙරිටේ රිසර්ච් ආයතනයේ පර්යේෂණ අධ්‍යක්ෂ සුභාෂිණී අබේසිංහ මෙනවිය විසින් මෙහෙයවනු ලැබේ.

ප්‍රාදේශීය ඒකාබද්ධතාවයේ වැදගත්කම

ශ්‍රී ලංකාවට ශක්තිමත් කලාපීය ඒකාබද්ධතාවයක් හරහා සාම්ප්‍රදායික අපනයන වෙළෙඳපොළවලට එහා ගිය අවස්ථා විවෘත කරගත හැකිය. කලාපීය සැපයුම් දාමයන්ට වැඩි වශයෙන් දායක වීම, වෙළෙඳ සම්බන්ධතාවල දියුණුව සහ ආර්ථික කොරිඩෝ වෙත සමීප සබැඳියාවන් ඇති කරගැනීම මඟින් ලොජිස්ටික්ස්, නිෂ්පාදන, අපනයන සේවා සහ ජාත්‍යන්තර නිෂ්පාදන ජාලයන් සමඟ සම්බන්ධිත අනෙකුත් අංශ වෙත ආයෝජන ආකර්ෂණය කර ගැනීමට සහාය වේ.

මෙම ජාලයන් තුළ ශ්‍රී ලංකාවේ ස්ථානය ශක්තිමත් කර ගැනීමට රට විසින් කළ යුතු දේ කුමක්ද යන්න මෙම සාකච්ඡාවේදී සලකා බලනු ලබයි. ඒ අතර, වෙළෙඳ සම්බන්ධතා වැඩිදියුණු කිරීම, ආයෝජන ආකර්ෂණය කර ගැනීම සහ සමාගම්වලට කලාපීය සහ ගෝලීය වටිනාකම් දාමයන්ට වඩාත් සාර්ථකව දායක වීමට හැකි ව්‍යාපාරික පරිසරයක් නිර්මාණය කිරීම මෙහිදී විශේෂ අවධානයට ලක් වේ.

එමෙන්ම, කලාපය පුරා ක්‍රියාත්මක වන ව්‍යාපාර සහ ජාත්‍යන්තර ආයතනවල අත්දැකීම්ද මෙහිදී විමසා බැලෙන අතර, සමාගම් වෙළෙඳපොළවල් තක්සේරු කරන්නේ කෙසේද, සැපයුම් දාමයන් ගොඩනඟා ගන්නේ කෙසේද සහ ආයෝජන සඳහා ස්ථාන තෝරා ගන්නේ කෙසේද යන්න පිළිබඳව ඉදිරි දෘෂ්ටිකෝණ ඉදිරිපත් කෙරේ. සැපයුම් දාම සහ ආයෝජන ප්‍රවාහයන් වැඩි වැඩියෙන් කලාපීය සම්බන්ධතාව මඟින් හැඩගැස්වෙන පසුබිමක, වෙළෙඳපොළ, ආයෝජන, නවෝත්පාදන සහ ආර්ථික වර්ධනය සඳහා අවස්ථා නිර්මාණය කරමින්, ආසියාවේ වර්ධන ජාලයන් තුළ වඩාත් තරගකාරී සහභාගිකයෙකු ලෙස ශ්‍රී ලංකාව ස්ථානගත කිරීමට අවශ්‍ය හවුල්කාරිත්වයන් සහ උපාය මාර්ගද මෙම සැසිය මඟින් සලකා බලනු ඇත.

SLEIS 2026 දෙවන දිනය

මෙම සැසිවාරය 2026 ශ්‍රී ලංකා ආර්ථික හා ආයෝජන සමුළුවේ දෙවැනි දිනයේ එක් අංගයක් ලෙස පැවැත්වෙන අතර, එය "වෙනස්වන ගෝලීය ආර්ථිකයක් තුළ ශ්‍රී ලංකාව ස්ථානගත කිරීම: ඔරොත්තු දීමේ හැකියාව, ප්‍රතිසංස්කරණ සහ ආර්ථික ප්‍රතිපත්තියේ අනාගතය" (Positioning Sri Lanka in a Changing Global Economy: Resilience, Reform, and the Future of Economic Policy) යන තේමාව යටතේ ක්‍රියාත්මක වීමට නියමිතය.

ලියාපදිංචි වීම සහ වැඩි විස්තර සඳහා sleis.chamber.lk වෙබ් අඩවිය විවෘත කර ඇත. වැඩි විස්තර සඳහා අලිකී ([email protected]) හෝ ශනුක ([email protected]) හරහා සම්බන්ධ විය හැකිය.