මරණ මිලියන 2ක් ඉක්මවලා දැන්වත් එන්නත් බෙදාගන්න එක්සත් ජාතීන් දැඩිව ඉල්ලයි

මිලියන 2ක ජීවිත බිලිගත් කොවිඩ්-19 වසංගතයෙන් පසුව, එක්සත් ජාතීන්ගේ ප්‍රධානියා විශේෂ ප්‍රකාශයක් සිදුකරමින් එන්නත් අතිරික්ත මාත්‍රාවන් රටවල් අතර බෙදා ගැනීම සඳහා දැන්ම කැපවන ලෙස ලොව ප්‍රමුඛ ආර්ථිකයන් හිමි රටවලට අවධාරණය කර තිබේ.

"ලෝකයේ ප්‍රමුඛ ආර්ථිකයන්ට විශේෂ වගකීමක් තිබෙනවා. එහෙත් අද අපි එන්නත් රික්තයක් දකිනවා. එන්නත් ඉක්මනින් ඉහළ ආදායම් ලබන රටවලට ළඟා වෙමින් පවතිනවා. ලෝකයේ දුප්පත්ම අයට කිසිවක් නැනැ" එක්සත් ජාතීන්ගේ මහලේකම් ඇන්ටෝනියෝ ගුටරෙස් වීඩියෝ පණිවුඩයක් නිකුත් කරමින් කියා සිටියේය.

"සමහර රටවල් අවශ්‍යතාවයෙන් ඔබ්බට ප්‍රසම්පාදනයන් පවා සිදුකර තිබෙනවා. ඔවුන්ගේ ජනගහනය ආරක්ෂා කිරීම සඳහා රජයන්ට වගකීමක් ඇති බව පිළිගත යුතුයි. නමුත් එසේ එන්නත් කිරීම ස්වයං පරාජයක් වන වුවත්, එය ගෝලීය ප්‍රකෘතිය ප්‍රමාද කරනු ඇති" ගුටරෙස් පැවසීය. "ප්‍රමාණවත් සැපයුමක් සහ සාධාරණ බෙදාහැරීමක් සහතික කිරීම සඳහා COVAX පහසුකම සහ ලොව පුරා රටවල් සමග කටයුතු කිරීමට නිෂ්පාදකයින්ගේ කැපවීම වේගවත් කළ යුතුයි. එන්නත් අතිරික්ත මාත්‍රාවක් බෙදා ගැනීමට රටවල් දැන් කැපවිය යුතුයි."

සියලුම රටවල් සඳහා කොවිඩ්-19 එන්නත් සඳහා වේගවත් හා සමානව ප්‍රවේශ වීම සහතික කිරීම සඳහා වන ලෝක සෞඛ්‍ය සංවිධානයේ ගෝලීය මුලපිරීම වන COVAX වෙතද ගුටරෙස් විශේෂ අවධානයක් යොමුකළේය.

"කනගාටුවට කරුණක් නම්, ගෝලීය සම්බන්ධීකරණ ප්‍රයත්නයක් නොමැති වීමෙන් වසංගතයේ මාරාන්තික බලපෑම වඩාත් නරක අතට හැරී තිබීමයි. එම මිලියන දෙකක ජීවිත සිහිපත් කිරීම සඳහා ලෝකය ඊට වඩා විශාල සහයෝගීතාවයකින් යුතුව ක්‍රියා කළ යුතුයි" යැයි ගුටරෙස් සිය වීඩියෝ පණිවුඩයේ සඳහන් කර තිබේ.

"ආරක්ෂිත, ඵලදායී කොවිඩ්-19 එන්නත් නිපදවනු ලැබෙනවා. ඉතිහාසයේ විශාලතම ගෝලීය ප්‍රතිශක්තිකරණ ප්‍රයත්නය බලමුලු ගැන්වීමට එක්සත් ජාතීන් සහයෝගය දක්වනවා. එන්නත් ගෝලීය පොදු භාණ්ඩ ලෙස, ජනතාවගේ එන්නත් ලෙස සැලකීමට අපි කැපවී සිටිනවා."