කොවිඩ් ආසාදිත ලැයිස්තුවේ පාකිස්තානය චීනය පසුකරයි

කොවිඩ්-19 හෙවත් නව කොරෝන වෛරසය ව්‍යාප්තියේදී මුලින්ම ආසාදිත ලැයිස්තුවේ පෙරමුණේ සිටි චීනය මේ වනවිට වෛරසය පාලනය කරමින් එම ලැයිස්තුවේ විශාල ලෙස පහළට ගොස් තිබේ.

ඒ අනුව චීනය පසු කරමින් මේ වනවිට ඉදිරියට පැමිණ ඇත්තේ දකුණු ආසියාතික රාජ්‍යයක් වන පාකිස්තානයයි. මීට පෙර ඉන්දියාව දකුණු ආසියාවෙන් චීනය පසුකර මුලින්ම ඉදිරියට පැමිණියේය.

ඒ අනුව පාකිස්තානය වැඩිම ආසාදිතයන් වාර්තා වන ලැයිස්තුවේ 17 වැනි ස්ථානයට පත්ව ඇත්තේ චීනය එහි 18 වැනි තැනට පත් කරමිනි.

ජෝන්ස් හොප්කින්ස් විශ්වවිද්‍යාලයට අනුව පාකිස්තානයෙන් අද (04දා) දහවල් වනවිට ආසාදිතයන් 85,264ක් වාර්තා වන අතර, ආසාදිත මරණ සංඛ්‍යාව 1,770කි. වෛරසය ආසාදිතව සුවය ලැබූවන් 30,128කි.

කෙසේ වෙතත් වෛරසය පාලනය කර ඇති චීනයෙන් වාර්තා වූ ආසාදිතයන් සංඛ්‍යාව 84,160කි. එරට සමස්ත මරණ සංඛ්‍යාව 4,638ක් වූ අතර, සුවය ලැබූවන් 79,404කි.

මැය මස මුලදී පාකිස්තානය සිය ලොක්ඩවුන් සීමා ලිහිල් කිරීම ආරම්භ කළ අතර, ඒ සමග ආසාදිතයන් වාර්තා වීමද ඉහළ යමින් තිබේ.