G7න් දුගී රටවලට කොවිඩ් එන්නත් මාත්‍රා බිලියනයක්

අද (11දා) දිනයේ සිට ආරම්භ වන සමුළුවේදී දුප්පත් රටවලට කොවිඩ්-19 එන්නත් මාත්‍රා බිලියනයක් පරිත්‍යාග කිරීමට හත්වැනි කණ්ඩායම (G7) එකඟ වනු ඇති බවත්, ලබන වසර අවසන් වනවිට ලෝකය සුවපත් කිරීමට එය උපකාරී වනු ඇති බවත් සමුළුවේ සත්කාරකත්වය දරණ බ්‍රිතාන්‍ය අගමැති බොරිස් ජොන්සන් අපේක්ෂා කරයි.

එක්සත් ජනපද ජනාධිපති ජෝ බයිඩන් ෆයිසර් එන්නත් මාත්‍රා මිලියන 500ක් පරිත්‍යාග කරන බව නිවේදනය කිරීමෙන් පැය කිහිපයකට පසු ජොන්සන් පැවසුවේ බ්‍රිතාන්‍යය අවම වශයෙන් අතිරික්ත එන්නත් මිලියන 100ක් දුගී රාජ්‍යයන්ට ලබාදෙන බවයි.

2022 අවසානය වනවිට මුළු ලෝකයටම එන්නත් ලබාදීමට කැපවන ලෙස ජොන්සන් දැනටමත් G7 නායකයන්ගෙන් ඉල්ලා ඇති අතර, මෙම කණ්ඩායම දින තුනක සමුළුවේදී එන්නත් මාත්‍රා බිලියනයක ප්‍රතිඥාවක් ලබාදීමට අපේක්ෂා කරයි.

සමහර කණ්ඩායම් මෙම සැලැස්ම මුහුදේ හෙළීමක් වැනි ක්‍රියාවක් හෙවත්, වැඩි බලපෑමක් හෝ වැදගත් වෙනසක් කිරීමට ප්‍රමාණවත් මාත්‍රා ප්‍රමාණයක් නොවන බවට හෙළා දැක තිබෙන්නේ, ඇස්තමේන්තු කර ඇති ආකාරයට අඩු හා මධ්‍යම ආදායම් ලබන රටවලට නොමිලේ එන්නත් මාත්‍රාවන් බෙදාහරින COVAX මත පමණක් බිලියන 4කට ආසන්න ජනතාවක් යැපෙන නිසාය.

"එක්සත් රාජධානියේ එන්නත් වැඩසටහනේ සාර්ථකත්වයේ ප්‍රතිඵලයක් ලෙස අපගේ අතිරික්ත මාත්‍රාවන් සමහරක් අවශ්‍ය අය සමඟ බෙදා ගැනීමට අපට දැන් හැකි වී තිබෙනවා." යැයි ජොන්සන් ප්‍රකාශයක් නිකුත් කරනු ඇති බව ඔහුගේ කාර්යාලය පවසයි. "එසේ කිරීමෙන් අපි මෙම වසංගතය යහපත සඳහා පරාජය කිරීමට දැවැන්ත පියවරක් තබනවා."

2019 දෙසැම්බර් මාසයේදී පළමු වැනි ආසාදිතයා හඳුනාගත් දින සිට කොවිඩ්-19 වෛරසය හේතුවෙන් මිලියන 3.9ක් පමණ මියගොස්, ගෝලීය ආර්ථිකය කඩාකප්පල් කර ඇත්තේ, රටවල් 210කට වැඩි සංඛ්‍යාවක ආසාදන පැතිරෙමිනි.

මේ වනවිට ලොවපුරා විද්‍යාඥයන් එන්නත් කඩිනමින් වෙළෙඳ පොළට ගෙනැවිත් ඇති අතර, බ්‍රිතාන්‍ය එරට වැඩිහිටි ජනගහනයෙන් 77%ක් සහ එක්සත් ජනපදය 64%ක් සඳහා පළමු මාත්‍රාව ලබා දී අවසන්ය. වසංගතය අවසන් වන්නේ සියලුම රටවල් එන්නත් කිරීමෙන් පසුව පමණක් බව ඔවුහු විශ්වාස කරති.

කෙසේ වෙතත් ගෝලීය ජනගහනය බිලියන 8කට ආසන්න වන අතර, වෛරසයේ ප්‍රභේදයන් මැඬපැවැත්වීම සඳහා බූස්ටර් මාත්‍රාවක්ද ලබාදීමට සිදු නොවන්නේ නම්, අවම වශයෙන් වැඩි පිරිසකට මාත්‍රාවන් දෙකක් අවශ්‍ය බව කියැවෙයි. කෙසේ වෙතත් ලෝකයේ ප්‍රබල රටවල මෙම කැපවීම් ආරම්භයක් සනිටුහන් කළද, එය තවදුරටත් ඉදිරියට යා යුතු බවත් වඩා වේගවත් විය යුතු බවත් විචාරකයෝ පවසති.

"මාත්‍රාව බිලියනයක් ලබාදීමේ G7 හි ඉලක්කය නිරපේක්ෂ අවමයක් ලෙස දැකිය යුතු අතර, කාල රාමුව වේගවත් කළ යුතුයි" දරිද්‍රතා විරෝධී ව්‍යාපාරයේ ලිස් වොලස් පැවසීය. "අපි මේ වෛරසය සමඟ තරගයක යෙදී සිටිනවා. එය තවදුරටත් ඉදිරියෙන් සිටින විට ගෝලීය ප්‍රගතිය අඩපණ කරන නව හා භයානක ප්‍රභේදයන්ගේ අවදානම වැඩි වේවි."

බ්‍රිතාන්‍ය ලබාදෙන අතිරික්ත මාත්‍රා මිලියන 100න් මිලියන 80ක් ලෝක සෞඛ්‍ය සංවිධානය (WHO) විසින් මෙහෙයවනු ලබන COVAX වැඩසටහනට යන අතර, ඉතිරි ඒවා ද්විපාර්ශවිකව අවශ්‍යතා ඇති රටවල් සමග බෙදාගනු ඇත.

දුප්පත් රටවලින් ඉවත්වීම වෛරසයට තවදුරටත් විකෘති වීමට හා එන්නත් මග හැරීමට ඉඩ සැලසීමක් බැවින්, දුගී රටවලට එන්නත් විශාල ප්‍රමාණයක් ලබාදීම සඳහා සැපයුම් සහාය අවශ්‍ය වනු ඇතැයි පුණ්‍යායතන විශේෂයෙන් පවසා ඇත්තේ ඖෂධ නිෂ්පාදන සමාගම්ද ඉලක්ක කරමිනි.

බ්‍රිතාන්‍ය පිරිනමන මාත්‍රාවන් සඳහා දැනටමත් ලබාගෙන ඇති කොටස්වලින් ලබාගන්නා අතර, ඔක්ස්ෆර්ඩ්-ඇස්ට්‍රාසෙනෙකා, ෆයිසර්-බයෝඑන්ටෙක්, ජැන්සන්, මොඩෙර්නා සහ වෙනත් සැපයුම්කරුවන්ගේ එන්නත් ඊට අයත් වනු ඇත.