ඇමෙරිකාව සමග යළිත් සාකච්ඡා ඇරඹීමට උ.කොරියාව කැමතියිලු

ඇමෙරිකා එක්සත් ජනපදය සමග න්‍යෂ්ටික න්‍යෂ්ටික සාකච්ඡා නැවත ආරම්භ කිරීමට උතුරු කොරියාව කැමැත්තෙන් සිටින බව එරට උප විදේශ ඇමතිවරයා පවසා තිබේ.

චෝ සොන්-හුයි පැවසුවේ දෙපාර්ශ්වයම එකඟ වූ පසුබිමක සවිස්තරාත්මක සාකච්ඡා නැවත ආරම්භ කිරීමට ඔවුන් කැමැත්තෙන් සිටින බවයි.

එක්සත් ජනපද රාජ්‍ය ලේකම් මයික් පොම්පෙඕ සාකච්ඡා නැවත ආරම්භ කිරීමට බලාපොරොත්තු පළ කිරීමෙන් පසුව ඇයගේ ප්‍රකාශය මෙසේ ඉදිරිපත් විය.

කෙසේ වෙතත්, ඇගේ කතාවෙන් පැය කිහිපයකට පසු කෙටි දුර ප්‍රක්ෂේපණ දෙකක් උතුරු කොරියාවෙන් දියත් කෙරුණු බව දකුණු කොරියානු මාධ්‍ය පවසයි. එය මෑත මාසවල ඔවුන් සිදුකළ මිසයිල පරීක්ෂණ මාලාවක නවතම අත්හදා බැලීමකි.

පසුගිය වසරේ දෙරටේ රාජ්‍ය නායකයන් අතර සිදුවූ පළමු රැස්වීමේදී එක්සත් ජනපද ජනාධිපති ඩොනල්ඩ් ට්‍රම්ප් සහ උතුරු කොරියාවේ කිම් ජොන් උන් කොරියානු අර්ධද්වීපයේ පූර්ණ න්‍යෂ්ටිකහරණයක් සඳහා එකඟ වූහ. නමුත් එයින් අදහස් කරන්නේ කුමක්ද යන්න හෝ එය සාක්ෂාත් කර ගන්නේ කෙසේද යන්න එහිදී තීරණය නොවුණි.

ඒ අනුව, පසුගිය පෙබරවාරි මාසයේ වියට්නාමයේ හැනෝයි හිදී සියුම් තොරතුරු සම්බන්ධයෙන් පැවති ඔවුන්ගේ දෙවැනි සමුළුවේදී එම සාකච්ඡා බිඳ වැටුණි.