ලංකා SOS ළමා ගම්මාන සංවිධානය මෙවර ලෝක ළමා දිනය වෙනුවෙන් ‘Together for Children - Ambassador Signing & Partnership Summit’ නමින් සුවිශේෂී උත්සවයක් සංවිධානය කර තිබුණි. කොළඹ Radisson හෝටලයේදී පැවති මෙම උත්සවයේදී ජාතික හා ජාත්‍යන්තර සම්මානලාභී පටිගත කිරීමේ ශිල්පිනියක් සහ ගායන ශිල්පිනියක් වන උමාරියා සිංහවංශ නව තානාපතිවරියක් ලෙස නිල වශයෙන් එක් වූ අතර හිටපු ජාත්‍යන්තර ක්‍රිකට් ක්‍රීඩකයෙකු මෙන්ම ගෞරවණීය ICC තරග තීරකයෙකු ලෙස කටයුතු කරනු ලැබූ රොෂාන් මහානාම ශ්‍රී ලංකා SOS ළමා ගම්මාන තානාපතිවරයෙකු ලෙස පැවැති දශකයක හවුල්කාරිත්වය අඛණ්ඩව පවත්වාගෙන යාම සමරනු ලැබීය.

රොෂාන් මහානාම සහ උමාරියා සිංහවංශ මෙම උදාර කර්තව්‍යයට දායක වනුයේ ස්වේච්ඡාවෙනි. ඔවුන් මීට පෙරද මෙවැනි සමාජ සත්කාරයන් සඳහා නිර්ලෝභීව දායක වී තිබේ. මෙම නව භූමිකාව තුළ ඔවුන් දරුවන්ගේ අයිතීන් පිළිබඳව ජනතාව දැනුවත් කිරීමට සහ තරුණ පරපුර සවිබල ගැන්වීමට දායක වනු ඇති අතර, රටේ දෙමාපිය රැකවරණය අහිමි වූ හෝ අහිමි වීමේ අවධානමකට මුහුණදී සිටින දරුවන් වෙනුවෙන් අරමුදල් රැස්කිරීමේ උත්සාහයන්ටද සහයෝගය ලබාදෙනු ඇත.

‘‘සෑම දරුවෙකුම ආදරය, ආරක්ෂාව සහ ගෞරවය සමඟ හැදීවැඩෙන බව සහතික කිරීම අපගේ අරමුණයි. මේ සුවිශේෂී සන්ධිස්ථානය එය නැවත වරක් සනාථ කරනවා. දශකයකට වැඩි කාලයක් පුරා රොෂාන් මහානාම මහතා අප වෙත දක්වන ලද සහයෝගය තව දුරටත් දිගු වීමත්, උමාරියා සිංහවංශ අපගේ තානාපතිවරියක ලෙස එක් වීමත් මගින් අපට පෙරටත් වඩා වැඩි පිරිසකගේ අවධානය දිනාගනිමින්, පිළිසරණක් අවැසි දරුවන්ට වැඩි වැඩියෙන් සහය වීමට හැකි වේවි. මේ ආකාරයට අපගේ හවුල්කරුවන් සමග එක් වී, රට පුරා වෙසෙන දරුවන්ට හා පවුල්වලට දීර්ඝකාලීන යහපතක් සිදු කළ හැකි සාමූහික මෙහෙවරක් ක්‍රියාවට නැංවීමට හැකි වීම අපට මහත් සතුටක්.” යැයි ශ්‍රී ලංකා SOS ළමා ගම්මාන සංවිධානයේ ජාතික අධ්‍යක්ෂ දිවාකර් රත්නදුරෙයි මහතා පැවසීය.

මෙම උත්සවයට සමගාමීව ශ්‍රී ලංකා SOS ළමා ගම්මාන සංවිධානය විසින් දරුවන් වෙනුවෙන් ලියැවුණු විශේෂ ගීතයක්ද එළිදක්වන ලදී. උමාරියා සිංහවංශ සහ ඇගේ සහෝදරිය වන උමාරා සිංහවංශ විසින් ගායනා කරනු ලබන මෙම ගීතය ශ්‍රී ලංකා SOS ළමා ගම්මාන සංවිධානයේ නිෂ්පාදනයකි. ආදරය, එකමුතු බව සහ බලාපොරොත්තුව යන තේමාවන් කැටිකර ගනිමින් එය නිර්මාණය කර තිබේ.

මෙම උත්සවයට සත්කාරක අනුග්‍රාහකත්වය ලබාදෙන ලද්දේ Radisson හෝටලය විසිනි. එය මෙබඳු මෙහෙවරකදී දරුවන්ගේ යහපත වෙනුවෙන් තානාපතිවරුන්, ආයතනික හවුල්කරුවන්, අධ්‍යක්ෂ මණ්ඩල සාමාජිකයින්, ජනමාධ්‍ය සහ තරුණ නියෝජිතයින් ඇතුළු සියලු පාර්ශ්ව එකම වේදිකාවකට රැගෙන ඒම සඳහා ආයතනික මට්ටමේ හවුල්කාරීත්වයන් කෙතරම් වැදගත්ද යන්නට සාක්ෂි දරයි. මේ ආකාරයට සියලුම පාර්ශ්වයන් වෙතින් ලැබෙන සහයෝගය තුළින්, තම දැක්ම වන ‘සෑම දරුවෙකුම පවුලකට අයත් විය යුතු අතර ආදරය, ගෞරවය සහ ආරක්ෂාව ඇතිව හැදී වැඩීමට ඔවුන්ට අවස්ථාව තිබිය යුතු ය’ යන්න යථාර්ථයක් බවට පත්කර ගැනීමට දිගින් දිගටම කැපවීම ශ්‍රී ලංකා SOS ළමා ගම්මාන සංවිධානයේ අරමුණ වී තිබේ.

SOS ළමා ගම්මාන යනු, දෙමාපිය රැකවරණය අහිමි වූ හෝ අහිමි වීමේ අවදානමකට මුහුණ දී සිටින දරුවන්ට පවුලකට සමාන රැකවරණයක් යටතේ හැදීවැඩීමට අවස්ථාව ලබා දීම අරමුණු කරගත් සුවිශේෂී සංවිධානයකි. මේ වන විට දිවයිනේ ගම්මාන 6 ක, නිවාස 72 ක් හරහා එම සංවිධානයෙහි මෙහෙවර ක්‍රියාත්මක වේ. මේ පිළිබඳ වැඩිදුර තොරතුරු සඳහා www.soschildrensvillages.lk වෙත පිවිසෙන්න.