යාල ජාතික වනෝද්යානයේ කලාප අංක 01 සහ 02 මේ මස 14 දා සිට ඔක්තෝබර් 15 දා දක්වා සියලුම සංචාරකයන් සඳහා මාසයක කාලයක් වසා දැමීමට තීරණය කර තිබේ.
පවතින වියළි කාලගුණික තත්ත්වය සහ අධික තාපය හමුවේ වනජීවින්ගේ පැවැත්ම හා පරිසර පද්ධතියේ ආරක්ෂාව තහවුරු කිරීමේ අරමුණින් මෙසේ වනෝද්යානය වසා තැබේ.
ශ්රී ලංකාවේ ශුෂ්ක කලාපයේ අවම වර්ෂාපතනයක් ලබන කලාපයක පිහිටි යාල උද්යානයේ I සහ II කලාප, අතීතයේ සිටම වාර්ෂිකව සැප්තැම්බර් හා ඔක්තෝබර් මාසවල පවතින දැඩි නියඟය හා අධික උෂ්ණත්වය හේතුවෙන් සතුන්ට ඇතිවන තාප ආතතිය (Heat Stress) අවම කිරීමට සාම්ප්රදායිකව වසා තැබීම සිදුවිය.
නියඟයෙන් පීඩාවට පත් සතුන් උදෙසා අඛණ්ඩව ජලය සැපයීම සහ උද්යානය තුළ පිහිටි ස්වාභාවික වැව්, පොකුණු හා දියවළවල් ප්රතිසංස්කරණය කිරීම කඩිනමින් සිදු කරන අතර කලාප I සහ II තුළ පිහිටි ප්රවේශ මාර්ග, ගොඩනැඟිලි, සංචාරක නිවාස සහ අනෙකුත් යටිතල පහසුකම්වල නඩත්තු හා අලුත්වැඩියා කටයුතු සිදු කිරීමටද නියමිතය.
මෙම කාලසීමාව තුළ I සහ II කලාප තුළට ඇතුළුවීමට අවසර හිමිවන්නේ වනජීවි සංරක්ෂණ දෙපාර්තමේන්තුවේ නිලධාරීන්ට සහ අදාළ කාර්ය මණ්ඩලයට පමණි.

