පසුගිය ජනාධිතිවරණය පැවති 2024 සැප්තෑම්බර් අග රු.බි. 28,574.65 ක් වූ ‘මධ්‍ය රජයේ සමස්ත නොපියවූ රාජ්‍ය ණය ප්‍රමාණය’ 2025 ජූනි අවසානය දක්වා වූ මාස 9 ක කාලය තුල රු. බි. 29,634.78 දක්වා එනම්, රු.බි. 1,060.13 කින් ඉහළ ගොස් ඇතැයි ශ්‍රී ලංකා මානව හිමිකම් කේන්ද්‍රයේ විධායක අධ්‍යක්ෂ රජිත් කීර්ති තෙන්නකෝන් මහතා නිකුත් කළ නිවේදනයක දැක්වෙයි.

ඒ අනුව, සැප්තෑම්බර් සිට ජූනි දක්වා මාස 9 තුල සෑම මසකටම රු. බි. 117.79 බැගින් ‘නොපියවූ රාජ්‍ය ණය ප්‍රමාණය’ ඉහළ යමින් ඇතැයි ඔහු පවසයි.

රාජ්‍ය ණය ප්‍රමාණය අඛණ්ඩව වැඩිවීමත්, විදේශ සංචිත ඉහළ දමා ගැනීමට නොහැකිවීමත්, අය වැය මගින් වෙන් කල ප්‍රාග්ධන අරමුදල් වැය කර ගත නොහැකිව ආපසු භාණ්ඩාගාරයට හරවා යැවීමට සිදුවීමත් ආර්ථික වර්ධනයට බලපෑම් කර ඇතැයි එම නිවේදනයේ දැක්වෙයි.

රජය බදු ආදායම, විදේශ ප්‍රේෂණ සහ සංචාරක ආදායම් වැඩි කර ගැනීමට සමත්ව ඇති නමුත්, දිගින් දිගටම රටේ නොපියවූ රාජ්‍ය ණය ප්‍රමාණය ඉහළයාම බලවත් අර්බුදයක් බව පෙන්වා දෙන ඒ මහතා මෙම තත්වය වඩාත් කැපී පෙනෙන්නේ අය වැය මගින් වෙන්කල ප්‍රාග්ධන මුදල් වැය කර ගැනීමට නොහැකිව නැවත භාණ්ඩාගාරය වෙත යොමුවීම නිසා රටේ ආර්ථික වර්ධනය ද අඩාලවීම නිසා බවද ඔහු පෙන්වා දෙයි.

එම නිවේදනයේ මෙසේද සඳහන් වෙයි..

2025 ජනවාරි සිට ජූනි දක්වා ලංකාවේ දේශීය ණය රු. බිලියන 18,309.66 සිට රු. බිලියන 18,806.08 දක්වා රු.බි.  496.42 කින් වැඩිවී ඇත.  

2025 ජනවාරි සිට ජූනි දක්වා භාණ්ඩාගාර බැඳුම්කර රු. බිලියන 14,079.20 සිට රු.බි. 14,944.78 දක්වා රු.බි. 865.58  තීව්ර වැඩිවීමක් සිදු ව ඇත.

එම කාලය තුල රු.බි. 10,429.04 ක් වූ විදේශ ණය ප්‍රමාණය රු. බි. 10,828.70 දක්වා රු.බි.  399.66 කින් වැඩිවී ඇත.

මේ අනුව, මේ වසර ආරම්භයේ දී රු.බි. 28,738.70 ක් වූ,  ශ්‍රී ලංකා ජනරජයේ සමස්ත ණය ප්‍රමාණය ජූනි මස අවසානය වන විට රු. බි. 29,634.78 දක්වා රු.බි. 896.08 කින් ඉහළ ගොස් ඇත.

 අනුර කුමාර දිසානායක මහතා ජනාධිපති ධූරයට පත් වූ 2024 සැප්තෑම්බර් මස අවසානයේ සිට ජූනි දක්වා (මාස 9 ට) ලංකාවේ දේශීය ණය රු. බිලියන 17,595.05 සිට රු. බිලියන 18,806.08 දක්වා රු.බි.  1,211.03 කින් වැඩිවී ඇත.     

පුනරුද රජය බලයට පත් වූ 2024 සැප්තෑම්බර් මස භාණ්ඩාගාර බැඳුම්කර ණය රු. බිලියන 13,198.51 ක් වූ අතර, එය 2025 ජූනි වන විට (මාස 9 ක් තුල) රු.බි. 14,944.78 දක්වා රු.බි. 1,746.27 කින් වර්ධනය වී ඇත.  

නව රජය බලයට පත්වී පාර්ලිමේන්තුව විසිරුවා හරින විට රු.බි. 10,979.60 ක් වූ, සමස්ත විදේශ ණය ප්‍රමාණය රු. බි. 10,828.70 දක්වා රු.බි. 150.70 කින් පහත වැටී තීබීම යහපත් තත්වයකි. බංකොලොත් භාවය ප්‍රකාශ කිරීමෙන් පසුව ද, ලංකා රජය අඛණ්ඩව බහුපාර්ශවීය ණය සහ පොලිය ගෙවමින් සිටී.   

ජනාධිපතිවරණය පැවති 2024 සැප්තෑම්බර් අවසානය වන විට රු.බි. 28,574.65 ක් වූ,  ශ්‍රී ලංකා ජනරජයේ සමස්ත ණය ප්‍රමාණය ජූනි මස අවසානය වන විට (මාස 9 ක් තුල)  රු. බි. 29,634.78 දක්වා රු.බි. 1,060.13 කින් ඉහළ ගොස් ඇත.

2025 මාර්තු මස ඩො. මි. 6,531 ක් වූ විදේශ සංචිත, අගෝස්තු අග වන  විට  දළ විදේශ වත්කම් ඩොලර් මිලියන 6,178 දක්වා ඩො.මි. 353 කින් පහත වැටී ඇත. 2023 – 2024 වසරවල මසකට ඩො. මි. 175 බැගින් වර්ධනය වෙමින් පැවති විදේශ සංචිත මේ වසර අවසානයේ ඉලක්කය වූ ඩො.මි. 7,500 ට ලඟාවීම සිදු නොවනු ඇත.

රටේ නිෂ්පාදනය ඉහළ නැංවීම සඳහා ආයෝජන සිදු කිරීමකින් තොරව, ජනතාව මත බදු බර පැටවීමෙන් පමණක් ආර්ථික ඉලක්ක වෙත ලඟාවීම අතිශියන් දුෂ්කර විය හැකිය.