කටුනායක නිදහස් වෙළෙඳ කලාපය සහ සෞඛ්‍ය වෛද්‍ය නිලධාරී කොට්ඨාසය තුළින් අද දින කොරෝනා වෛරසය ආසාදිත රෝගීන් 32 දෙනෙකු වාර්තා වී ඇති බව ගම්පහ දිස්ත්‍රික් ප්‍රාදේශීය සෞඛ්‍ය සේවා අධ්‍යක්ෂ , වෛද්‍ය නලීන් ආරියරත්න මහතා පැවසීය .

කටුනායක නිදහස් වෙළෙඳ කලාපය තුළ පිහිටා ඇති කර්මාන්තශාලා 03 සේවය කරන 20 දෙනෙකුට  අද දින මෙම කොරෝනා වෛරසය ආසාදනය වී තිබේ .

ඒ අතරින් කටුනායක බ්‍රැන්ඩික්ස් කර්මාන්තශාලාවේ සේවය කරන 14 දෙනෙකු මෙම වෛරසයට ගොදුරු වී ඇති අතර , ඒ අනුව මේ දක්වා මෙම කර්මාන්තශාලාව තුළින් කොරෝනා ආසාදිත සේවකයින් 52 දෙනෙකු වාර්තා වී ඇති බව ද වෛද්‍ය නලීන් ආරියරත්න මහතා පැවසීය .

එසේම කටුනායක සීදුව සෞඛ්‍ය වෛද්‍ය නිලධාරී කොට්ඨාසය තුළින් ද තවත් කොරෝනා ආසාදිත රෝගීන් 12 දෙනෙකු වාර්තා වී ඇති අතර ඒ අනුව මේ දක්වා මෙම කොට්ඨාසය තුළින් කොරෝනා ආසාදිත රෝගීන් 908 දෙනෙකු වාර්තා වී ඇති බව ද වෛද්‍ය නලීන් ආරියරත්න මහතා පැවසීය .

මෙසේ වාර්තා වී ඇති රෝගීන් කෑගල්ල , පින්නවල මූලික රෝහල වෙත වැඩිදුර වෛද්‍ය ප්‍රතිකාර සදහා යොමු කිරීමට පියවර ගෙන තිබේ .