ඩුබායි සිට කටුනායක ගුවන් තොටුපොළ වෙත පැමිණෙමින් තිබූ එමිරේට්ස් ගුවන් සේවයේ ගුවන් යානය තුළ සේවයේ නිරත වී සිටි 39 හැවිරිදි දකුණු අප්‍රිකානු ජාතික ගුවන් සේවිකාවකට , උඩු ගුවනේ දී ලිංගික අතවර සිදු කළ ශ්‍රී ලාංකික ගුවන් මගියෙකු , කටුනායක ගුවන් තොටුපොළ පොලීසිය මගින් අත් අඩංගුවට ගෙන ඇති අතර , ඔහු 05/29 දින කොළඹ ප්‍රධාන මහේස්ත්‍රාත් අධිකරණය වෙත ඉදිරිපත් කිරීමට නියමිතය.
නැවක කපිතාන්වරයෙකු ලෙස සේවය කරන 49 හැවිරිදි ඔහු යාපනය ප්‍රදේශයේ පදිංචි ද්‍රවිඩ ජාතිකයෙකි. ඔහු 05/28 දින උදෑසන 09.00 ට ඩුබායි සිට එමිරේට්ස් ගුවන් සේවයේ ඊ.කේ.- 650 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණි .
ඔහු එසේ එම ගුවන් යානයෙන් පැමිණෙමින් සිටි අතරතුර අධික ලෙස බීමත්ව එම ගුවන් යානයේ සේවය කරමින් සිටි දකුණු අප්‍රිකානු ජාතික ගුවන් සේවිකාවට ලිංගික අතවර සිදු කර තිබේ .
ඇය වහාම මේ පිළිබඳ ගුවන් යානයේ නියමුවා දැනුවත් කර , එම ගුවන් යානය කටුනායක ගුවන් තොටුපොළ වෙත ගොඩ බැස්සවීමෙන් අනතුරුව , මෙම ගුවන් මගියා ගුවන් තොටුපොළ ආරක්ෂක නිලධාරීන්ගේ ද සහාය ඇතිව , පොලීසිය විසින් අත් අඩංගුවට ගෙන තිබේ .
පසුව මෙම ගුවන් මගියා මීගමුව අධිකරණ වෛද්‍යවරයා වෙත ඉදිරිපත් කිරීමෙන් අනතුරුව , මොහු බීමත්ව සිටි බවට , කරුණු තහවුරු වී තිබේ .
ඒ අනුව මෙම ගුවන් මගියා 05/29 දින කොළඹ ප්‍රධාන මහේස්ත්‍රාත් අධිකරණය වෙත ඉදිරිපත් කිරීමට නියමිතය . මෙම අත් අඩංගුවට ගැනීම සහ මේ පිළිබඳ වැඩිදුර විමර්ශන කටයුතු කටුනායක ගුවන් තොටුපොළ පොලීසියේ ස්ථානාධිපති ප්‍රධාන පොලිස් පරීක්ෂක එල්මෝ මැල්කම් පේට් මහතාගේ උපදෙස් සහ අධීක්ෂණය යටතේ උප පොලිස් පරීක්ෂක වීරසිංහ , කාන්තා පොලිස් සැරයන් 2588 හේරත් සහ කටුනායක ගුවන් තොටුපොළ සංචාරක පොලිසියේ කාන්තා පොලිස් සැරයන් 5496 ප්‍රියදර්ශනී යන නිලධාරීන් විසින් සිදු කරමින් සිටිති .
