X
සොරොස්ත්‍රියානු ආගම
( . . ) 2017-12-06 13:00:23
Comments - 0       Views - 1014

සරතුස්ත්‍රතුමා යනු ක්‍රිස්තු පූර්ව 1600කට එපිටින් වූ අතීතයේ ජීවත් වූ ආගමික ශාස්තෘවරයෙකි. අදටත් ලෝකයේ මිනිසුන් කණ්ඩායමක් විසින් අදහනු ලබන සොරොස්ත්‍රියානු ආගම දේශනා කරන ලද්දේ  ඔහු විසිනි. ඇතැම් උගතුන්ගේ මතය වන්නේ ඔහු විසින් ලෝකයේ පැරණිතම දහම දේශනා කරන ලද බවයි. මේ වන විට ලොව පුරා එක්ලක්ෂ අනූදහසක් පමණ එම ආගම අදහති. ඔවුන්ගෙන් වැඩි පිරිසක් ජීවත් වන්නේ ඉන්දියාවේ සහ ඉරානයේයි. 

සරතුස්ත්‍රතුමා ඉරානයේ ජීවත් වූවෙකි. ඔහු විසින් ආරම්භ කරන ලද ආගම ඉපැරණි පර්යාවේ විශාල වශයෙන් ව්‍යාප්ත විය. ඒ ඉස්ලාම් දහම ව්‍යාප්ත වන්නට ප්‍රථමයෙනි. ප්‍රඥාවේ දෙවියා වන අහුරා මැස්ඩා (Ahura Mazda) ඇදහීම මෙම ආගමේ සිදුවෙයි. දිව්‍යලෝකය සහ අපාය පිළිබඳ එහි විශ්වාසයක් විය. යුදෙව් දහම ඉස්ලාම් දහම ඇතුළු පසුකාලීනව බිහි වූ බොහෝ ධර්මයන්ට මෙහි බලපෑම එල්ල වූ බව විශ්වාස කෙරේ. 

සොරොස්ත්‍රියානු ආගමේ ඇති මූලික විශ්වාසයක් නම් අනෙකාට සේවය කිරීමයි. පාර්සිවරු සොරොස්ත්‍රියානු ආගම අදහන්නෝ වෙති. විශේෂයෙන් ඉන්දියාවේ සිටින පාර්සිවරුන් මේ සම්බන්ධයෙන් කීර්තියක් දිනාගෙන ඇත. එම ආගම අනුව ස්ත්‍රී පුරුෂයන්, දුප්පතුන් දිළින්දන්, මහල්ලන් තරුණයන් ආදී සියලුදෙනා සමානයන් ලෙස සැලකිය යුතුය. කෙනෙකු තවත් කෙනෙකුට වඩා ශ්‍රේෂ්ඨ වන්නේ උසස් ගතිගුණවලින් පමණකි. 
සොරොස්ත්‍රියානු ආගම හා බැඳුණු බොහෝ වතාවත් තිබේ. ඔවුන් විසින් අනුගමනය කරනු ලබන අවමංගල්‍ය චාරිත්‍රය ලෝකයේ විශේෂිත වූවකි. මළසිරුරක් භූමදානය කිරීම තුළින් පොළොව අපවිත්‍ර වෙතැයි ඔහු සලකයි. එබැවින් ඔවුන් මළසිරුරු හෙළන්නේ කුලුනක් මතටය. ඩොක්මා හෙවත් නිහඬතාවේ කුලුන වශයෙන් මෙය හඳුන්වනු ලැබේ. ඉන්දියාවේ මුම්බායිහි 35,000ක් පමණ පාර්සිවරු  ජීවත් වෙති. 

එබැවින් ඔවුන්, වනගත ප්‍රදේශයක අක්කර 57ක් පමණ වෙන් කරගෙන ඩොක්මා කණු සිටුවා ඇත. මෙම කණු මතට මළසිරුරු දැමීමෙන් පසු ගිජු ලිහිණියෝ ඒවා කා දමති. බටහිර රටවල මෙම චාරිත්‍රය සිදුකිරීමට අපහසු බැවින් පාර්සිවරු මළසිරුරු ආදාහනය කරති.
ශ්‍රී ලංකාවේද පාර්සි ප්‍රජාවක් ජීවත් වෙමින් සිටින අතර, එය ඉතා සුළු සංඛ්‍යාවකි. 20 වැනි සියවසේ මැද භාගයේ දී පමණ 300 දෙනෙකු පමණ ජීවත් වූ බවට වාර්තා තිබේ. එම සංඛ්‍යාව අද වන විට තවත් අඩු වී තිබේ. ශ්‍රී ලංකාවේ විසූ කීර්තිමත් පාර්සිවරයෙකු වශයෙන් හිටපු අමාත්‍ය කයිර්ෂසප් නරිමාන් චොක්සි හෙවත් කේ. එන්. චොක්සි මහතා පෙන්වා දීමට පුළුවන. ඔහුගේ පිය පාර්ශ්වය මෙන්ම මවු පාර්ශ්වයද ශ්‍රී ලංකාවේ ආනයන අපනයන ආර්ථිකයට විශාල දායකත්වයක් දැක්වූ ඉන්දියාවෙන් සංක්‍රමණය වූ පාර්සි පවුල්වලට අයත් වෙළෙඳ ව්‍යාපාරිකයෝ වූහ. 

ඉන්දියාවේද පාර්සි ජන කොට්ඨාසය ශීඝ්‍රයෙන් අඩු වෙමින් පවතින අතර, මෙවැනි විශේෂිත ජන කණ්ඩායම් රැකගැනීම ලෝක උරුමයක් ලෙස සැලකෙනු ඇත. ඔවුන් සතුව පැවති සුවිශේෂිත සංස්කෘතියක්ද අහිමි වී යෑමේ අවදානමක් ඇත. යුනෙස්කෝව විසින් මේ සඳහා PARZOR නම් ව්‍යාපෘතියක්ද 1999 වසරේදී ආරම්භ කරන ලදී. මෙම ව්‍යාපෘතියට ඉරානය, ඉන්දියාව, උස්බෙකිස්ථානය, ඇෆ්ගනිස්ථානය මෙන්ම ශ්‍රී ලංකාවද අයත්ය. 

- දර්ශන අශෝක කුමාර

 

සොරොස්ත්‍රියානු ආගම සඳහා ලැබී ඇති ප‍්‍රතිචාර (0)
Leave a comment
Name :
Email :
Comment :
Logged in as Sign Out
Comment :
 
අත් හරින්න එපා!

වයස කියන්නේ ඉලක්කමක් විතරයි. සාර්ථකත්වය වෙනුවෙන් ඔබේ බලාපොරොත්තු ජීවත් කරවන්න.

Posted by Union Assurance PLC on Tuesday, November 14, 2017